Boikott Israel

Appelsinar, avokado, kinakål, stangselleri og økologiske gulrøter er varer du skal vera på vakt mot dersom du vil boikotta israelske varer. Men no kan Coop koma til å gjera jobben lettare for boikott-villige nordmenn.

- Leiinga i Coop i heile Skandinavia er opprørte over framferda til Israel dei siste vekene, seier informasjonsdirektør Bjørn Kløvstad i Coop Noreg.

Tilsaman har Coop fem millionar medlemmar i dei tre skandinaviske landa, og mange av desse har teke kontakt for å be om boikott av Israel. - Dette er viktige meldingar for ein organisasjon som er oppteken av medlemsdemokrati, seier Kløvstad.

Rema 1000 derimot kjem ikkje til å boikotta varer frå Israel. I staden kjem dei til å merka varene som kjem frå Israel.

- Boikott er ein god måte å gjera folk medvitne om det som skjer i Midtausten, seier stortingsrepresentant Øystein Djupedal frå SV. Han meiner også at regjeringa må vurdera ein norsk handelsboikott av Israel dersom ikkje Israel snart kjem tilbake til forhandlingsbordet.

Christopher Stensaker frå framstegspartiet derimot meiner det er feil av ein butikk-kjede å gå til boikott. - Folk må sjølve få avgjerda kva dei vil handla, seier han.