Fritt skuleval i Trondheim

Torsdag skal bystyret i Trondheim ta stilling til om foreldra i bydelen Tiller fritt skal kunna velgja skule for barna sine. Samtidig vil Høgre at skulepengane frå kommunen skal fylgja kvar enkelt elev, og at skulane skal offentleggjera eksamensresultat.

- Berre på denne måten får foreldra eit fritt skuleval, seier Trygve Bragstad som er fraksjonsleiar for Høgre i oppvekstkomiteen i Trondheim. Han vil at skulane skal marknadsføra seg sjølve på internett med resultat og satsingsområde.

Arbeidarpartipolitikar Rune Olsø vil ikkje ha ei slik ordning. Han er redd det skal føra til a- og b-skular. Dersom ein skule slit, vil det føra til at ærgjerrige foreldre flyttar barna sine over til ein annan skule. Og når pengane skal fylgja eleven, vil skulen med problem i utgangspunktet, få mindre pengar og dermed endå større problem. Samtidig er han redd for at elevar ikkje skal koma inn på nærmiljøskulen sin, og må skyssast lange vegar for å gå på skule.