Det norske lovverket er for uklart når det gjeld mobbing og ansvar, meiner mobbeforskar Dan Olweus. Han krev ei mobbelov som gjer at lærarane kan straffast om ikkje dei grip inn mot mobbarane. - Gi dei heller sparken, seier Helga Hjetland.
Av:
Audhild Gregoriusdotter Rotevatn
Aldri før har så mange norske born vorte mobba på skulen. Ei undersøking som mobbeforskar Dan Olweus har gjort viser at 75 000 norske born vert mobba. Men lærarar som ikkje grip inn, kan ikkje straffast for det. Det er i dag ikkje ulovleg for ein lærar å la vere å gripe inn.
-Lova må endrast
-Lærarar som er vitne til mobbing og ikkje grip inn, bør kunne straffst, meiner Dan Olweus. Han etterlyser ei endring i Opplæringslova som opnar for at læraren kan stillast til strafferettsleg ansvar. Ei slik lov har dei i Sverige.
- Lova i dag er ikkje forpliktande nok, seier Olweus.
- Gi dei heller sparken
Men leiar i Utdanningsforbundet, Helga Hjetland, vil ikkje ha ei ny lov. Ho meiner at Opplæringslova er god nok og at lærarane - og alle andre tilsette i skulen- er plikta til å gripe inn mot mobbing.
- Eg trur ikkje at ei lov som kan straffe lærarane er løysinga. I dag er det mogeleg å gje lærarar som ikkje gjer jobben sin sparken, seier Hjetland.
Ho meiner at skuleleiinga må ta ansvaret og rettleie lærarane, dersom dei ikkje tek mobbinga alvorleg nok. I verste fall bør læraren fjernast frå jobben.
Tips andre om denne saken
Utskriftsvennlig versjon
