Jan Petersen vil ikkje ta stilling til om det er rett av amerikanarane å bruka militærdomstolar for å stilla terrormistenkte for retten.
Men no møter han motstand for det mange meiner er ei slapp haldning til dei amerikanske planane om å ta i bruk militærdomstolar i rettsoppgjeret etter terroråtaka 11.september.
I spørjetimen ba Kristin Halvorsen frå SV, Bjørn Jacobsen frå SV og Åslaug Haga frå Senterparti regjeringa om å kreva at terrormistenkte skal rettsforfylgjast i ein internasjonal rett.
Også i regjeringspartia Venstre og Kristeleg Folkeparti er det stor motstand mot dei amerikanske planane om militærdomstolar. Det er betenkeleg at eit land tar seg til rette i ein internasjonal konflikt, seier Lars Rise frå Kristeleg Folkeparti til Her&Nå. Både han og den parlamentariske leiaren i Venstre, Trine Skei Grande meiner militærdomstolar er lite demokratiske fordi rettsforhandlingane der er lukka.
Men begge dei to er positive til at Jan Petersen i Stortinget i dag sa at regjeringa legg til grunn at USA held seg til menneskerettane, og at Noreg ikkje kjem til å utlevera nokon som risikerer dødsstraff i eit anna land.
Amnesty International Norge skriv i ei pressemelding etter spørjetimen i dag at Jan Petersen ikkje kan ha forstått rekkevidda og innhaldet i den militære domstolen den amerikanske presidenten har oppretta.
Tips andre om denne saken
Utskriftsvennlig versjon
