Kirke over alle grenser heiter kampanjen. Målet er at lesbiske og homofile skal kunna bli prestar eller ha andre vigsla stillingar i kyrkja, sjølv om dei lever i partnerskap.
Generalsekretær Cecilie Widnes i Norges Kristelige Studentforbund seier dette ikkje minst for dei homofile sjølve som gjerne vil delta i kyrkjeleg arbeid. Samtidig ønskjer organisasjonen å auka engasjementet rundt soknerådet.
Gjennom internett oppmodar kampanjen folk om å stilla til soknerådsvalet, eller røysta på folk som går inn for full integrering av homofile og lesbiske.
Soknerådsvalet handlar om makta i kyrkja. Men svært få bryr seg om det. For fire år sidan røysta berre tre prosent av kyrkjemedlemmene i soknerådsvalet. Mange stader måtte det også mild tvang til, for å få folk til å stilla til val.
Den manglande oppslutninga om soknerådsvalet er eit demokratisk problem som både kyrkja sjølv og kyrkjedepartementet vil gjera noko med. Departementet har løyvd ni millionar kroner for å få fleire til å delta i valet til sokneråd i haust.
Kristeleg folkparti-politikar i Oslo, Gunnar Prestegård, meiner kampanjen er kyrkjesplittande, og at kampanjen bør avlysast med ein gong. Dei som står bak kampanjen, manglar sans for det kyrkja skal vera, seier han.
Generalsekretær Karl Johan Hallaråker i Indremisjonsforbundet kallar kampanjen for usmakeleg. Dette er i strid med kyrkjas lære, seier Hallaråker.
Tips andre om denne saken
Utskriftsvennlig versjon
