Nesten 300 elevar på Nyborg Oppvekstsenter i Trondheim er utan skule. I går kveld stengde verneombodet skulebygningane fordi han meiner det er helsefarleg for elevar og tilsette å vera der. Ei ny undersøkjing dokumenterer at 90 prosent av lærarane og 80 prosent av elevane har helseplager som kan skuldast sopp og råte.
Skulen er bygd tidleg på 60-talet og var den gongen rekna som ein fin skule. Då var asbest-plater rekna som eit glimrande byggjemateriale. I dag veit me at det kan føra til lungekreft å pusta inn asbest-støv. Og det gjer lærarar og elevar på Nyborg Oppvekstsenter kvar einaste dag.
Foreldre og lærarar på skulen har i lang tid visst at inneklimaet på skulen ikkje har vore bra. Men denne veka la representantar i foreldreutvalet fram ei helse-undersøkjing som viser at nesten alle på skulen har helseplager som allergi og astma, vondt i hovudet eller konsetntrasjonsproblem. Det fekk verneombodet til å stenga skulen.
Verneombod og foreldre er samde om at bygningane på Nyborg Oppvekstsenter må sanerast, og at det må byggjast nytt med ein gong. Det kjem til å kosta Trondheim Kommune 70 millionar kroner. I tillegg er det mange andre skular som har tilsvarande sopp-problem som Nyborg. Dermed kan rekninga for kommunen koma opp mot ein milliard kroner skriv Adresseavisen.
Fredag var kommunaldirektøren og arbeidstilsynet på skulen for å finna ut om det er rett å stenga skulen. Resultatet av den undersøkjinga blir klar etter pinsehelga.
Tips andre om denne saken
Utskriftsvennlig versjon
