Verdas helseorganisasjon reknar med at det kjem til å bryte ut ein koleraepidemi i Sør-Irak, etter at det er registrert 17 tilfelle av kolera på to sjukehus i Basra.
Av
Tor Helge Haugland
WHO fryktar også at andre infeksjonssjukdommar som blir overførde gjennom vatn, kan bryte ut i Basra, den nest største byen i landet.
- Vi reknar med ein koleraepidemi i Sør-Irak, og vi fryktar fleire hundre tilfelle, sa Fadila Shaib, talskvinne i WHO, på ein pressekonferanse i Basra i dag.
Ho er uroa, men ikkje overraska over koleratilfella som er oppdaga, skriv telegrambyrået AFP.
Sjukdomsspesialist Denis Coulombier i WHO, har kalkulrt at det er ti gonger så mange tilfelle som dei 17 som er oppdaga.
Han seier at tre andre sjukehus i Basra truleg har fleire smitta pasientar.
Årsaka til utbrotet av kolera er at folk har drukke vatn direkte frå kjelda Shatt al-Arab, og at søppeltøminga i Basra ikkje fungerer, meiner WHO.
Også diare, mage-tarmkatarr og dehydrering rammar innbyggjarane i Basra.
Folk i området som ikkje har tilgang til inntransportert vatn, har fått beskjed om å koke vatnet før dei drikk det.