Det utvikla seg til samanstøytar mellom demonstrantar og politiet i etterkant av fredsdemonstrasjonen i Oslo i ettermiddag.
Av
Tor Helge Haugland |
| Flere tusen demonstrerte mot krigen i Irak. Demonstrasjonen starta med appellar framfor Stortinget for så å gå til den amerikanske ambassaden. (Foto: Thomas Bjørnflaten / Scanpix) |
Fire-fem demonstrantar blei sende til legevakta der dei fekk behandling for lettere sår- og bitskadar, og ein politimann blei skadd då han fekk ein stein i ansiktet.
Av demonstrantane politiet la i bakken midt på Karl Johan, var den kjende blitzaren Stein Lillevolden.
Tre personar er melde for vald mot politiet. Av dei 19 personane politiet tok inn etter samanstøytane, blei 17 sette fri igjen etter kort tid.
Samanstøytane starta då rundt 100 ungdommar tok til å kaste først egg og deretter steinar mot politiet i etterkant av fredsdemonstrasjonen utanfor den amerikanske ambassaden på Drammensveinen i Oslo.
Tåregass
Politiet svara først med å bruke tåregass. Deretter sette politiet inn både hundar og politihestar mot demonstrantane.
Politiet pressa demonstrantane nedover Karl Johan i sentrum av Oslo.
Til saman blei 19 personar arresterte av politiet, og først ved 18-tida var bråket over.
Ei rekkje forretningar i området rundt den amerikanske ambassaden er tilgrisa med spraymaling.
Fredeleg
Fredsdemonstrasjonen starta klokka 14 og gjekk fredeleg for seg. Det var først då ei lita gruppe av demonstrantane starta å kaste stein mot politiet, at det kom til sammenstøytar mellom politi og demonstrantar.
Demonstrasjonen starta med appellar framfor Stortinget, før folkemengda på rundt 5.000 gjekk deretter mot den amerikanske ambassaden.
Fredsaktivist Petter Nome sa til stor applaus at den amerikanske presidenten George W. Bush har sørgt for å bli eit symbol saman med Osama bin Laden på religiøs fanatisme, omsynslaus vald og forakt for internasjonal rett.
Nome takka samstundes statsminister Kjell Magne Bondevik (KrF) for å ha gjort det heilt klart at Noreg seier nei til krigen mot Irak.
Då det utvikla seg til slagsmål i etterkant av demonstrasjonen, sa Nome at det var noko dei som arrangørar tok kraftig avstand frå.
- Det er ikkje våre folk, og dei er ikkje velkomne hit, sa han til NRK.
Tips andre om denne saken
Utskriftsvennlig versjon
