Inger Johanne Austad har levert si røyst. Sjølv om ho ikkje trur politikarane held lovnadane sine.
Av
Kjetil Malkenes Hovland
- Det var ikkje noko vanskeleg val, seier Inger Johanne Austad.
Vi er på Oslo Katedralskole for å ta pulsen på lokalvalet 2003. I døra står ein venleg herre og fortel oss kva reglar som er nye av året.
- Hugs for all del å brette setelen. Der er ingen konvoluttar i år, seier han.
- Skulen og dei eldre
Etter turen bak skjermbrettet spør vi Inger Johanne Austad kva saker som vart avgjerande for henne.
- Det er jo skulen og dei eldre, då, seier ho.
- Men det er det same som gjentar seg kvar gong. Dei lover og lover, men held det aldri!
Utanfor vallokalet står to unge menn frå høvesvis Venstre og Arbeidarpartiet og gjer eit siste desperat forsøk på å sanke røyster.
- Nokre kloke hovud hjå oss i Venstre har rekna ut at vi kaprar åtte prosent av stemmene våre i Oslo på denne måten, seier Eiliv Frich Flydal og deler ut ei liste til ein forbipasserande veljar.
- Skremmande mange usikre
- Det er skremmande mange som ikkje har bestemt seg, istemmer Trond Jensrud frå Ap.
Begge står med ein bunke setlar i handa for å kapre ”siste liten-veljarane”, dei som vil nytte sin demokratiske rett til å røyste, men ikkje heilt har bestemt seg for parti.
I Oslo kan nokre få røysters overvekt avgjere kven som blir byrådsleiar.
Ifølgje Venstre-representanten er partiet hans representert utanfor alle vallokala i Oslo for å kapre veljarar.
- Dette er eit verdival
 |
| Trond Jensrud frå Ap (t.v.) og Eiliv Frich Flydal frå Venstre prøver å kapre "siste liten-veljarane" utanfor Oslo katedralskole. |
- Både høgre- og venstresida meiner dette er eit verdival, seier Flydal.
- Du kan seie at det er eit val mellom dei som vil ha fridom, og dei som vil ha tvang.
Men mannen med Ap-listene er usamd.
- Eller eit val mellom dei som vil selje kommunen og dei som vil ta vare på han, svarer Jensrud kjapt.
Men munnhoggeriet tek snart slutt. Det er ikkje så mykje att å seie for politikarane. No er det veljarane sin tur. Og dei får siste ordet.
- Eg trur diverre ikkje det blir noko god valdeltaking, seier Jensrud.
- Eg er optimist, etter å ha stått på gata og prata med folk, seier Flydal.
Tips andre om denne saken
Utskriftsvennlig versjon
