Senterpartiet gjorde eit brakval i Solund, med 36,2 prosent av røystene og ein framgang på 24,3 prosentpoeng i høve til kommunevalet for fire år sidan.
Av
Ivar Longvastøl.
Dermed ligg det an til at Gunn Åmdal Mongstad kan bli ny ordførar, dersom Senterpartiet går i allianse med Arbeidarpartiet og Sosialistisk Venstreparti.
Til saman har desse partia no åtte av totalt 15 representantar i det nye kommunestyret i Solund.
Utan politisk erfaring
Gunn Åmdal Mongstad er utan politisk erfaring, men som engasjert lærar er ho ei kjend og godt likt kvinne i øykommunen. Det er 15 år sidan ho og ektemannen, som er økonomisjef, kom til kommunen. "Solund" til 1000" er hennar fremste kampsak, og det inneber at ho vil arbeide for at talet på innbyggjarar skal krype over tusentalet att.
Elendig for Ap
Arbeidarpartiet har gjort eit elendig val og står att med 8,4 prosent, som er ein tilbakegang på heile 23,5 prosentpoeng. Dermed må Ap nøye seg med ein representant i kommunestyret.
Også Høgre opplever ein dramatisk tilbakegang. For fire år sidan hadde partiet 50,7 prosent, og er no nede i 31,9 prosent. Dermed skal det halde hardt om Edel Færøvik Bontveit får overta ordførarklubba etter Steinar Krakhellen som gir seg etter denne perioden. For Høgre er situasjonen meir normalisert, etter protestvalet for fire år sidan då partiet opplevde ein uvanleg framgang.
Bra for FrP og SV
Framstegspartiet kjem inn i kommunestyret med to representantar. FrP var ikkje med for fire år sidan. Sosialtisk Venstreparti er om like store som FrP, og kan også vise til framgang i høve til siste lokalval.