Stryn

Innbyggarar : 6 700
Tid for resultat : omlag 22.30
Leiar i valstyret : Nils P. Støyva

Politisk karakteristikk

Stryn har det mest allsidige og stabile næringslivet i fylket vårt, med mykje lokalt eigarskap. Tradisjonelt er det ein Senterpartikommune, men ved siste val ville ikkje listetoppen til Sp stille som ordførar. Mot fem røyster frå Høgre og FrP samla kommunestyret seg om den unge listetoppen til Arbeidarpartiet, Nils P. Støyva, som ordførar. Varaordførar er Johanna Nygjerd, KrF.

Politisk situasjon

Det er grunn til å rekne med at Nils P. Støyva vert attvald som ordførar i Stryn. Han har vunne respekt og vert sett på som ein som har ”framtida føre seg” i Arbeidarpartiet. Sp og Høgre har nye listetoppar i Per Atle Kjøllesdal og Sissel Skogen, men det skal godt gjerast at ein av dei maktar å vippe vekk sitjande ordførar. SV stiller kommunevalliste i Stryn for fyrste gong, med Liv Elisabet Rygg på toppen.

Framstegspartiet har lenge hatt godt fotfeste i Stryn, og har med sine fire kommunestyrerepresentantar den største FrP-gruppa i fylket. Men Audun Muri står ikkje lenger på toppen av lista, og han har hatt godt veljartekke. Listetopp no er Anders Magne Vik.

Demokratane stiller liste både til kommunevalet i Stryn og til fylkestingsvalet med den tidlegare FrP-mannen Arve Espelund på toppen.

Dette er listetoppane ved kommunevalet i Stryn i 2003: Nils P. Støyva, Ap, Johanna Nygjerd, KrF, Per Atle Kjøllesdal, Sp, Sissel Skogen, H, Anders Magne Vik, FrP, Liv Elisabet Rygg, SV, Torstein Tvinnerheim, V og Arve Espelund, Demokratane.

Aktuelle saker

Det er ingen heite stridstema i Stryn for tida. Men det er ein gryande debatt om skulestrukturen, styrking av omsorgssektoren og FrP sitt ynskje om privatisering av offentlege tenester. Rekneskapet for 2002 syner balanse.

Utad kjempar stryningane for utbygging av Stryn vidaregåande skule, bygging av Kvivsvegen og utbetring av riksveg 60 Olden-Innvik. Varaordførar Johanna Nygjerd, KrF, har vore frontfigur for utbetringa av denne riksvegen, som ”alle” tykkjer det bør gjerast noko med, men som det er vanskeleg å få prioritert. Det er ikkje sett av ei einaste krone til Kvisvegen eller riksveg 60 i framlegget til Nasjonal Transportplan 2006-2015.

Stryningane er kjende for å mobilisere for ”sine” kandidatar. Ved siste fylkestingsval fekk høgremannen Eivind Grov 350 røyster frå Stryn til fylkestingsvalet. Men i år er Stryne-kandidatane spreidde på mange parti,
og i tillegg har nabokommunen Hornindal Cecilie Thaule Løvlid på tredjeplass på Ap-lista.

Kommunestyret 1999-2003

Stryn kommunestyre har 31 medlemmer; 5 Ap, 4 FrP, 5 H, 4 KrF, 11 Sp, 2 V.

Lister 2003:

Ap, FrP, H, KrF, Sp, SV, V og Demokratane.

Stryn kommunestyre skal frå hausten av reduserast til 25 representantar.

Aktuelle politikarar:

Nils P. Støyva, Ap,
Johanna Nygjerd, KrF,
Per Atle Kjøllesdal, Sp,
Sissel Skogen, H,
Anders Magne Vik, FrP,
Liv Elisabet Rygg, SV,
Torstein Tvinnerheim, V,
Arve Espelund, Demokratane.

Til fylkestingsvalet er Johanna Nygjerd nr 5 på KrF-lista, Arve Glomnes står på 6. plass på FrP-lita, Sissel Skogen har 6. plass på Høgre si liste, Laila Melkevoll er nr 6 på Sp-lista, Jon Aaning er nr 3 på lista til Kystpartiet og Arve Espelund toppar lista til Demokratane.

Ved valet i 1975 var Hornindal ein del av Stryn kommune.