Innbyggjarar: 4950
Tid for resultat: 23.00
Leiar i valstyret: Ernst Veum
Politisk karakteristikk:
Arbeidarpartiet har hatt full kontroll i ein av dei rikaste kommunane i fylket gjennom 14 år. Men heller ikkje Luster er nokon søndagsskule.
Politisk situasjon:
Med Ernst Veum som ordførar i 14 år, og eit Arbeidarparti som er blitt stadig større, så skulle ein tru at partiet satsa på å halde fram suksessformelen. Men i vinter vart partiet på nytt råka av bygdekrangelen mellom Hafslo og Luster på den eine sida, og Jostedalen og Gaupne på den andre. Ernst Veum vart kasta og tok til takke med 2. plassen. Inger Marie Evjestad frå Gaupne tok over topp-plassen.
Arbeidarpartiet i Luster har fleire medlemmer enn noko anna kommuneparti i fylket. Årsaka er truleg at det har vore stor mobilisering i dei fire lokallaga for å få flest medlemmer, og dermed størst tyngde innad i Arbeidarpartiet.
I år blir det stilt fleire lister i kommunen enn nokon sinne. Det kan føre til at Arbeidarpartiet sitt hegemoni blir rokka ved. Det same gjeld striden i Arbeidarpartiet, og spørsmålet om opprustinga av sjukestova i Luster.
Torodd Urnes frå KrF blir sett på som den største utfordraren til Evjesand. Kommuneveterinæren er både godt kjend og godt likt i kommunen. Kjellfred Weum frå Senterpartiet er også ein utfordrar. Tradisjonelt sett var partiet svært sterkt i Luster.
Aktuelle saker:
Luster er ein svært rik kommune, og har like mykje på bok som i gjeld. Det – og geografien i den store kommunen – gjer at spørsmålet om kommunesamanslåing blir sett på som heilt uinteressant. Sjukestova i Luster var nok den direkte årsaka til striden om kven som skulle toppe Ap-lista ved dette valet. Også der stod dei lokale partilaga i Ap mot kvarandre.
Kommunestyret 2000-2003:
29 medlemmer i Luster kommunestyre: Ap 17, Felleslista (Sp, KrF og H) 11, V 1.
Lister 2003:
Sju lister: Ap, KrF, Sp, H, V, FrP, SV
Aktuelle politikarar:
Inger Marie Evjestad og Ernst Veum frå Ap, Torodd Urnes frå KrF, Kjellfred Weum frå Sp, Tor Bremer toppar Arbeidarpartiet si fylkestingsliste og er også leiar for Arbeidarpartiet. Ola Martin Bakken er høgt oppe på Krf si fylkestingsliste.