Innbyggjarar : 1 505
tid for resultat : 22.30
Leiar i valstyret : Åse Kari Einevoll
Politisk karakteristikk
Balestrand har gått frå å vere ein tradisjonell Sp-kommune til å bli ein god kommune for Venstre. Partiet har hatt ordføraren sidan 1995, og det er sannsynleg at Åse Kari Einevoll held fram også etter valet i haust. Den einaste utfordraren er KrF-veteranen Erland Fagermoen, som gjev seg i fylkespolitikken og kjem att i kommunepolitikken, etter å ha vore ute siste perioden.
Det er Venstre, KrF og Ap som har samarbeidd om konstitueringa i Balestrand etter dei to siste kommunevala. Ved valet i 1999 gjorde Venstre eit svært godt val, og fekk 6 representantar. Det skal godt gjerast å halde på den posisjonen etter åtte års maktslitasje. Varaordførar i Balestrand er Kari Maria R. Fjærestad, Ap.
Politisk situasjon
Overføringa av Fjærland til Sogndal førde ikkje til store endringar ved siste val.
Ved dei seinare vala har SV/RV samarbeidd om liste, men ikkje i år. No stiller SV med eiga liste. I motsetning til i mange andre kommunar stiller mange av kommunestyremedlemmene i Balestrand på att.
Desse står på fyrsteplass på kommunevallistene i år: Åse Kari Einevoll, Venstre, Erland Fagermoen, KrF, Odd Atle Linde, Ap, Ragnar J. Urtegård Thue, Høgre, Jarle Midttun, Sp og Helge Pedersen, SV.
Aktuelle saker
Balestrand kommunestyre vedtok i mai å omarbeide planane for Balestrand Nye Helsetun, for å få eit billegare bygg. Vedtaket vart gjort med 9 mot 8 røyster. Det var Venstre som ivra for ei billegare utbygging, og fekk støtte frå ein frå Sp, ein frå Høgre og SV/RV. Det sitjande kommunestyre kjem til å behandle ferdig saka om helsetunet, og bygget må bli ferdig i løpet av 2005 for at kommunen skal behalde statstilskotet.
Dei siste åra har Balestrand kommune kutta mykje for å få tenestetilbodet i samsvar med inntektene. I 2001 vart det kutta 13 årsverk, i 2002 heile 20 årsverk. Dette er nærmare 10 % av det totale talet tilsette, og det merkast.
Balestrand kommune har i 2003 eit oppsamla underskot på 15,7 mill. kroner.
Kommunestyret 1999-2003:
Balestrand kommunestyre har 17 medlemmer; Ap 4, H 2, KrF 2, Sp 2 , SV/RV 1 og Venstre 6 repr.
Lister 2003:
Ap, H, KrF, Sp, SV og Venstre
Aktuelle politikarar:
Når no Erland Fagermoen trekkjer seg frå fylkestinget etter mange år er det ingen frå Balestrand på sikker plass til fylkestingsvalet. Balestrand kjem ikkje til å få representantar i det neste fylkestinget.