Zarqawi seier han er lettare såra

Av Bent J. Tandstad

Abu Musab al Zarqawi er leiar for Al Qaida i Irak. (AP/Scanpix)

Lydbandopptaket vart lagt ut på ei islamistisk side på Internett i kveld, marknadsført som ei viktig melding til sjølvaste Al Qaida-sjefen, Osama bin Laden.

- Når det gjeld meldingane om at eg er alvorleg såra, så vil eg forsikre deg om at dette berre er lause rykte. Men eg har vore lettare såra, seier røysta i opptaket.

- Eg er for tida saman med brørne mine og folket mitt i landet Mesepotamia, der eg deltek i kampar mot krossfararane og fiendar av islam, heiter det vidare.

Mesopotamia er eit gammalt namn på området mellom dei to elvane Eufrat og Tigris i Irak.

I går kom det meldingar om at Zarqawi hadde flykta, truleg til Iran, for å få behandling på sjukehus. Men dette er basert på rykte, og det har ikkje vore mogleg å få verifisert meldingane. (NRK-AFP)