Minst 28 menneske er drepne i eit sjølvmordsangrep på eit italiensk politihovudkvarter i Nassiriya i det sørlege Irak i føremiddag. Rundt 100 skal vere skadde.
Av
Bent J. Tandstad
Italias forsvarsminister Antonio Martino opplyser at minst 19 italienarar er drepne og at rundt 20 italienarar er skadde i den doble sjølvmordsaksjonen. Ni av dei døde er irakarar, det er også flesteparten av dei skadde.
|
Det var to lastebilar lasta med sprengstoff som eksploderte inn i bygningen. (Scanpix-foto) |
Lastebil
Fleire italienske politifolk vart stengde inne i ruinane, blir det opplyst, men det er uklart om det framleis er folk i ruinane.
Det som skjedde var at ein tankbil køyrde inn i hovudkvarteret til dei italienske politistyrkane i stor fart. Det var to menn om bord i tankbilen. Den eine skaut mot vaktene, medan den andre køyrde bilen. Tankbilen var truleg utstyrt med ein mekanisme som utløyste eksplosivane i bilen.
Store delar av bygningen vart øydelagd i den kraftige eksplosjonen. Tidlegare vart det meldt at kunne ha vore eit rakettangrep, men dette blir no avvist. Det tok fyr i fleire køyrety utanfor politihovudkvarteret i Nassiriya, blir det opplyst. Også eit ammunisjonslager gjekk i lufta. Angrepet skjedde klokka 08.40 norsk tid.
Forsvarsminister Antonio Martino seier at soldatar som er lojale mot den tidlegare irakiske presidenten Saddam Hussein er ansvarlege for sjølvmordsaksjonen i Nassiriya i dag. Han baserer dette på det kallar bevis på bakken og etterretningsrtapportar. Han seier at dei Saddam-lojale i Irak samarbeider tett med andre arabiske ekstremistar.
Det er uklart kven han sikta til med uttrykket arabiske ekstemistar, men det har vore spekulert i om Al Qaida-nettverket er aktivt inne i Irak. Ingen har teke på seg skulda for det blodige angrepet i dag.
|
Flagget utanfor det italienske politihovudkvarteret i Roma vart heist på halv stang i dag. (Foto: Alessandra Tarantini (AP-Scanpix) |
3000
Italia har ein styrke på rundt 3000 mann i Irak som ein del av den internasjonale okkupasjonsstyrken i landet. Styrken består av både bakkestyrkar, flyvåpen-soldatar og tre marinefarty med mannskap. 40 friviljuge frå Røde Kors er også ein del av den italienske kontingenten.
Hovuddelen av styrken har vore stasjonert i Nassiriya, der det har vore realtivt roleg dei siste månadene.
Dei italienske politisoldatane har ikkje vore utsette for angrep i Irak tidlegare. Det er Storbritannia som har kommandoen i denne delen av Irak.
Italias statsminister Silvio Berlusconi seier i ein kommentar at sjølvmordsaksjonen i Irak ikkje vil endre landet sin Irak-politikk. - Ingenting kan endre vårt ynskje om å hjelpe til med å byggje opp att Irak til eit land med sjølvstyre, tryggleik og fridom, sa Berlusconi blant anna.
Tilbaketrekking
Samstundes krev opposisjonen i Italia at landet trekkjer styrkane sine ut av landet. Pietro Folena frå det viktigaste opposisjonspartiet, Venstredemokratane, seier det slik:
- Soldatane vart sende til eit Irak i flammar fordi regjeringa ville gjere Bush-administrasjonen ei teneste, utan å vurdere kva risiko soldatane vart utsette for. No må dei iralienske soldatane sendast heim. Det er det einaste rette å gjere slik situasjonen er, seier Folena.
Fleire andre opposisjonspolitikarar har gitt uttrykk for liknande haldningar etter at nyheita om bombeeksplosjonen i Nassariya vart kjend.
|
Det italienske politihovudkvarteret i Nassiriya fekk vart fullstendig øydelagt. (Scanpix-foto) |