Telemark Mållag sin Målpris for 2003 gjekk i år til Kjell Bitustøyl frå Bø. Prisen er eit tresnitt av Terje Grøstad "Vinterfjell" med motiv av Gaustatoppen og vart utdela i samband med Telemark Mållag sitt årsmøte på Bø Hotell laurdag. 13. mars.
I grunngjevinga heiter det:
Telemark Mållag har gjeve Målprisen til Kjell Bitustøyl for hans mangeårige arbeid som kulturformidlar gjennom Telemarksfestivalen, dei siste åra som ein høgt profilert styreleiar. Og som mangeårig redaktør av Spelemannsbladet.
|
Kjell Bitustøyl (t.v.) fekk prisen av mållagets leiar, Ragnar Lurås. (Foto: Ragnvald Christensson) |
- Kjell Bitustøyl har vore ein uredd og engasjert forsvarar av Telemarksfestivalen. Han har fått både Kronprinsesse Märtha, tidlegare statsminister Kåre Willoch og SOS Rasisme til å tale varmt for den norske kulturarven og nynorsken.
- Kjell Bitustøyl har sørga for å sette Bø og Telemark på kartet som eit kulturfylke. Og er sterkt medansvarleg for at Telemarksfestivalen uttrykker seg på nynorsk i alt dei gjev ut, både i pressemeldingar, programinformasjon og på internett.
Det sa leiar i Telemark Mållag, Ragnar Lurås, då han overrekte prisen på kulturkvelden til Bø Mållag i samband med årsmøtet i Telemark Mållag.
- Dette var uventa. Eg har alltid forsvara nynorsken, og Målprisen gjev ein veldig inspirasjon. Eg meiner nynorsken og folkemusikken er to minoritetskulturar som treng kvarandre.
- For meg er nynorsk knytta til identitet, og min måte å uttrykke tankar og kjensler på, sa Kjell Bitustøyl då han tok i mot Målprisen for 2004.