- Også vi i London har gledd oss til denne dagen. Vi skal jo snart få fleire av kongefamilien flyttande inn i vår kyrkjelyd, så det er ikkje fritt for at vi meiner å vere i ei særleg stilling ein slik dag, fortel Geir Myklebust som er kateket i sjømannskyrkja.
Det er ikkje berre kronprinsparet som kjem til London. 16.juni feirer noverande St. Olavs kyrkje 75 års-jubileum, og då kjem både Kongen og Dronninga på vitjing til London.
Dei fyrste forventningsfulle gjestane kom til sjømannskyrkja allereie i 12-tida.
- Vi sette fram koldtbord slik at det kunne vere litt festmat også her, fortel kateketen i kyrkja. Sjølvsagt må ein ha god mat attåt slike hendingar!
Då sendinga starta var 80 personar samla, og det var nokre som måtte fram med lommetørkledet etter kvart som seremonien skreid fram.
- Det var gripande å lytte til både lesingane og talen, og bileta frå NRK formidla det på ein glimrande måte, skriv Geir Myklebust til oss.
Fleire av gjestane vart sitjande utover kvelden, og kyrkja serverer vaflar og kaffi så lenge det er folk!
|
Det vart servert koldtbord, kaffi og vaflar til gjestane. Om lag 80 personar var samla i London for å sjå bryllaupet på storskjerm. Foto: Geir Myklebust |