| | Såg tre springe under brua Publisert 29.05.2001 12:24 Eit vitne er sikker på at han såg tre personar springe under gangbrua den natta Arve Beheim Karlsen forsvann. Så langt i saka har det blitt fortalt fleire ulike versjonar av kor mange personar som var på brua, og kvar det blei av dei.
Vitnet, som køyrde gjennom Sogndal sentrum fredag 23. april 1999, har i politiavhøyr sagt at han berre såg to personar like ved rundkøyringa. I forklaringa si i dag sa han at det var ei misforståing. Han seier han heile tida har vore sikker på at han såg tre personar som sprang inn under gangbrua.
Vidare seier han at det var 10 meter mellom dei to tiltalte og Arve, og at dei tiltalte sprang side om side. Vitnet, ein pensjonist frå Fjærland, seier han er 100% sikker på at alle dei tre personane han såg sprang under brua.
Fleire versjonarTidlegare i rettsaka har ulike vitne fortalt fleire versjonar av kva som skjedde ved gangbrua den natta. Den hovudtiltalte er ikkje sikker på om han fylgde etter Arve under gangbrua, medan den andre tiltalte seier han fortsette rett fram etter brua.
Kameraten som var med Arve då han sprang ifrå hovudtiltalte seier alle tre sprang under brua, og at berre den andre tiltalte kom opp att på den andre sida.
| |
Seint fredag 23. april 1999 vart Arve Beheim Karlsen jaga over ei gangbru i Sogndal. Bak han kom to unge menn som i følgje tiltalen ropte "drep han" "drep denne negeren".
Måndagen etter vart den indiskfødde 17-åringen funnen drukna i Sogndalselva.
|
|
