OVERSIKT | NYHETER | SPORT | MUSIKK | UNDERHOLDNING | FILM | LITTERATUR | MAT | BARN | UPUNKT |
Her er du: NRK > Nyheter > Distrikt > NRK Sogn og Fjordane > Beheim Karlsen-saka | Oppdatert 10.10.2001 17:05 |
| Beheim Karlsen-tragedien Publisert 16.05.2001 15:17 - Oppdatert 18.05.2001 18:48
av Vidar Vie Arve Beheim Karlsen vart eit symbol på kva mobbing og rasisme kan føre til. Han gav opp skulegangen på Øyrane vidaregåande skule på grunn av mobbing, og dette forfulgte han også i heimekommunen Luster og den natta han drukna. På alle dei vidaregåande skulane over heile landet vart det halde eit minutt stille den dagen gravferda var. I Sogn og Fjordane vart det sett i gang eit eige mobbeprosjekt då det kom fram kva han hadde opplevd. Men berre ei handfull personar visste kva han hadde opplevd før 17-åringen vart meld sakna om morgonen måndag den 26. april. Då kom det fram at han over lenger tid hadde følt seg truga av ein gjeng frå Sunnfjord. To i denne ungdomsgjengen hadde blitt observert klokka 23.30 fredagen før, då dei sprang etter Beheim Karlsen og ropte rasistiske uttrykk etter han. Dei vart tekne inn til avhøyr søndagen, og lensmannen i Sogndal, Arne Johannessen, frykta at det hadde skjedd noko kriminelt med 17-åringen frå Luster. Måndag føremiddag vart han funnen død i Sogndalselva av dykkarar, og dagen etter vart det konstatert at han hadde drukna. På onsdagen vart det kjent at dei to ungdommane var sikta for forsetteleg drap, og dei vart henta heime av politiet. Advokaten til den eine av dei to, Anders Folkman, sa klienten var sjokkert over den alvorlege siktinga. Politiet meinte på dette tidspunktet at dei to hadde skubba eller skremt han i elva. Seinare vart denne siktinga lagt vekk, og heller ikkje krav frå dei pårørande om at det måtte takast ut tiltale om drap førte til at det skjedde. Les meir om tiltalen her: Tiltalen Samtidig som politiet held fram med sin jobb førte historia til Arve Beheim Karlsen altså til at mobbing og rasisme kom stadig sterkare på dagsorden. SOS Rasisme, Antirasistisk Senter og fleire politiske ungdomsorganisasjonar markerte dødsfallet framfor Stortinget dagen etter at han vart funnen drukna. Det vart oppretta eit eige minnefond som skulle gje tilskot til tiltak mot rasisme og vald, og fylkesdirektøren for undervisning, Reidar Sandal, sette i gang ein full gjennomgang av mobbeproblematikken. Kort tid etter dødsfallet kom det fram at Øyrane vidaregåande skule hadde lagt lok på mobbesaka der. Då han slutta ved skulen hadde han bede om at skulen ikkje lot mobbinga kome ut - av frykt for represaliar. Ein av dei to sikta var elev ved den same skulen. Også statsministeren og fleire andre sentrale politikarar tok opp saka som døme på kva rasisme kunne føre til.
|
|
Copyright NRK © 2001 - Telefon: 815 65 900 - E-post: info@nrk.no - 03.01.2009 03:38 |