Les og høyr om korleis Hjelvikpoteten kom til landet, og bli kjend med jordskokken - eit godt alternativ til poteten!
Hjelvikpoteten
I radioprogrammet "Mat med Mindor" den 3. november fortalde Anne Helene Kristiseter om korleis farfar hennar, Ottar Hjelvik, hadde med seg nokre potetar som han hadde teke med seg frå ein engelsk båt heim til Nordgarden i Hjelvika i Rauma . Det var desse som etter kvart blei utbreidde i mange bygder i fylket vårt under namnet "Hjelvikpotet". Denne engelske potetsorten heiter eigentleg "Abundance". Klikk på lydlenkja ovanfor og høyr historia om dette potetslaget.
Jordskokk
Denne rotveksten stammar eigentleg frå Nord-Amerika og kom til Noreg på 1600-talet. Han er av solsikkefamilien, og plantane blir svært høge. Jordskokk kan brukast som alternativ til poteten i svært mange oppskrifter med potet, men smaken er noko annleis. Mange oppfattar jordskokksmaken som nøttaktig og svakt søtleg.
Nettsida "Matportalen" har ein interessant artikkel om jordskokken som eit spesielt interessant alternativ for diabetikarar. Artikkelen finn du her:
Matportalen
Jordskokk er altså både sunt og godt. Ver varsam når du kokar han - jordskokken tåler mindre koking enn poteten, og har lett for å bli blaut. Han bør heller ikkje liggje mange dagar i romtemperatur etter at du har fått han i hus - legg han i kjøleskapet eller et han helst med det same.
Det kan vere vanskeleg å få tak i jordskokk. Få - om nokon -daglegvarebutikkar fører jordskokk, men restaurantane spør etter han av og til, så han finst på dei store grønsaklagra. Det finst også ein og annan som har jordskokk i kjøkenhagen sin, og somme gardbrukarar prøver seg med jordskokkdyrking i samarbeid med forsøksringane i landbruket. Prøver du hardt nok, får du sikkert tak i jordskokk!
Skorsonerrot/svartrot
er ein annan vekst som smakar godt og er eit godt supplement til potet og grønsaker. Røtene er lange og smale, kvite inni og svarte utanpå. I redioprogrammet vårt 3/11 serverte Mindor Klauset "potetgull" av skorsonerrot, dvs. tynne, frityrsteikte skiver av rota. Programleiar Odd Sørås fekk smake skorsonerrot for første gong, og syntest at den frityrsteikte svartrota smakte som ein mellomting mellom potetgull og bacon!
Les om svartrot på heimesida til Agder naturmuseum og botaniske hage:
Agder naturmuseum
Du finn også litt om skorsonerrot t.d. på nettsida ABC/Matoppskrifter:
ABC/Matoppskrifter
Elles finn du interessant stoff på denne svenske nettsida:
Grön gastronomi