Stortingsvalet i lomma

Publisert 03.09.2001 14:04 - Oppdatert 10.09.2001 13:25

I samband med storsatsinga rundt valet, publiserer NRK valdata frå heile landet også på WAP.

Så lenge ein er i eit område med GSM-dekning vil ein dermed kunne studere landsoversikten eller følgje oppteljinga for kvart fylke og kvar einaste kommune frå sekund til sekund.

Brukarane vil til ei kvar tid få all informasjon om oppmøte, talet på talte røyster og mandatfordeling.

Opplysningane vert henta frå den same databasen som NRK nyttar i TV-sendingane sine, men tenesta er automatisert, og brukarane vil i mange tilfelle få opplysningane før dei vert vist i TV-ruta. Lokale og nasjonale valnyheiter samt dei siste meiningsmålingane kompletterer WAP-tilbodet. NRK tilbyr all informasjonen gratis.

Valdataoversikta føyer seg inn i rekkja av eit allereie rikhaldig tilbod på NRK sin WAP-portal som også inneheld mellom anna nyheiter, sport, trafikkvarsel, vêret verda rundt og upunkt.

Adressa er: wap.nrk.no

(NRK)