Gievrien feeleme 300 jaepiej tjïrrh
Saemien jaahkosne gievrie lij akte dejstie vihkielommes daevierijstie.
Dah åtnasovvin voejkenen åejvijste ovmessie ritualine edtja raerieh vedtedh jallh gaskesem åemiealmetjigujmie åadtjodh.
1700-låhkoen aatskadi saemide kristegassjine darjodh. Gærhkoe lij guhkiem pryöveme saemide jarkestehtedh bielelen dejnie lyhkesidh.
Misjonæærine Thomas von Westen njueniehkisnie lin eajhnadovveme dellie maaje edtjin saemide minngedsgeatjan kristegassjine darjodh.
Von Westen golme misjovnefeeleminie saemien dajvine mïnni. Dïhte daajroem saemien religijovnen bïjre reebli, guktie aelhkebelaakan meehti dam nåhkehtidh.
Dan gaavhtan gievrie lij joekoen vihkeles bielie saemien eatnemejaahkosne, sagke vihkielåbpoe sjïdti gærhkose dejtie tjåagkestidh.
Aktene sov misjovnefeelemijstie dïhte Freavnantjahken gievrien aajhterh gaavnedi, Bendix Andersen jïh Jon Torchelsen.
Dah gievrien symbovlh eevre veelelaakan buerkiestin.
Jalhts daah notaath dam daalah gååvnesieh, tjuara laejhtehks årrodh gaaltijidie gosse edtja dejtie nuhtjedh gievriem guarkedh. Ij leah gidtjh seekere saemieh sïjhtin gaajhkem soptsestidh dej aejliegommes daeveren bïjre.
Gosse Freavnantjahken gievrien aajhterh stillesovvin dam von Westenasse deelledh, soptsesåvva dah voejhkelin baataridh.
Jaepien 1723 dah tjoerin gievriem, sijjen væljoen vööste, von Westenasse deelledh.
Jalhts doh jeenjemes gievrieh bualalgin jallh eerjesovvin, Freavnantjahken gievrie jeatjah vuerpiem åadtjoeji.
Dïhte gidtjh Danmarhken-Nöörjen gånkese seedtesovvi Københavnesne.
Danmarhkesne dan lin jienebi aajhteri luvnie, åvtelen slåahtese Elisabethenburg Tysklaantesne haajpani, mij daan biejjien lea Meiningen museume.
Tysklaantesne lea gievriem hijvenlaakan gorredamme. Dan hijvenlaakan guktie daan biejjien dïhte vuajnelge goh akte dejstie gievrijste maam bööremeslaakan gorredamme.
Meiningen museumisnie dïhte musihketjïehtjelisnie gævnjesje, jalhts ij leah musihkeinstrumente.
Daelie, 300 jaepieh mænngan sualasovvi, edtja bååstede åehpies dajvide.
Gievriem vååregelaakan burhtjen sïjse geabra ...
... jïh burhtjem skruvvigujmie steegkie.
Daelie guhkies feeleme vuertieminie.
Mænngan 2000 kilomeeterh vuajeme, gievrie gåatan båata.
Snåasesne almetjh gievriem tjåadtjan dåastoehtieh mearan gïetigujmie kleehpieh, jalhts ajve burhtjem vuejnieh man sisnie lea.
Luhkiegöökte biejjieh mænngan gåatan bööti, åarjelsaemieh maaje åadtjoeh gievriem gåetesne vuejnedh jïjtse dajvesne.
Tjarke heannadimmie jeenjesidie.