– Mun dovddan dat lei váddát daiguin čáppa sániiguin, danin go dat eai čuoččo kommentárain, dadjá Julie Solbakken (15).
Sámi joatkkaskuvllas Kárášjogas leat čohkken čáppa ja fasttes sániid sápmelaččaid birra.
Čáhppes ja vilges gákti
Sámevuođa illu ja moraš
Su mielas lea unohas go servodagas lea olu sámevašši.
– Dat váikkuha mo mun smiehtan iežan birra, ja buot sápmelaččaid birra. Vaikko dieđán diet ii leat duohta, de bissehit servodatovdánahttima, muitala Solbakken.
Sámi giellavahku oktavuođas vižže kommentáraid sosiála mediain ja daiguin sii hervejedje čáhppes ja vilges gávtti.
Sámi joatkkaskuvlla oahppit oidnet gávttiid juohke beaivvi feaskáris.
Dat lea muittuhussan duohta sámi árgabeaivvi birra.
Sámevašši leavvan
Amnesty-raporta čájeha ahte sámevašši leavai Fovse-akšuvnnaid maŋŋel.
Maŋŋel go Máhkarávju orohagas eallobihttá doddjui ja duššai ihte váivves kommentárat Facebookas.
Gávttit sáhttet buktit rámisvuođa, muhto maiddái váivvidahttit.
Čuvvot liiggás mielde
– Mii čuovvut mielde mo váikkuha ohppiid. Dat dieđusge čuohcá go don oainnát mo olggobeale servodat čuoggu min, dadjá oahpaheaddji Ann Kristine Balto.
Oahpaheaddji mielas dat dattetge lea dehálaš prošeakta, ja son sávvá dán nanosmahttit nuoraid.
– Doaivumis dat veahá suhttet, ja de nanosmuvvet. Go dovddat veahá váivvi, de nanosmuvat.
Manne lei váttis čáppa sániid gávdnat?
Sámediggeráđđi Runar Myrnes Balto (NSR) suorganii go jearaimet sus mo son livččii govahallat sápmelaččaid positiivvalaččat.
– Dat lea hui olu maid sáhttá dadjat, ja dát lei hui váttis jearaldat. Mus eai leat sánit oaivvis juste dál, dadjá Balto.
Muhto go son beassá smiehtastit, de vástida ná:
– Dieđusge doppe gávdnojit hui olu čába diŋggat maid sáhttá dadjat sápmelaččaid birra, ja eambbosat stuorraservodagas berrejit dan bargat, muitala Balto.
Danne lea Sámediggi bivdán ráđđehusas veahki bidjat johtui kampánjja cielaheami vuostá.
Joatkkaskuvllaoahppit ges sávvet olbmuid oahppat eambbo sápmelaččaid birra.
– Mun lean fuomášan ahte máddin eai soaitte oahppat nu olu sápmelaččaid birra. Jos eambbo oahpahusa oažžu, de šaddá buoret áddejupmi, dadjá Solbakken.
Guhtemuš sániiguin don hervešit gávttiid?
Ansvarlig redaktør: Vibeke Fürst Haugen
Nettsjef: Hildegunn Soldal