– Bures boahtin dáistaleapmái Operas!
Nu čuorvvui ISÁK joavku go konsearta álggii.
Diimmu ovdal ISÁK konseartta Operas, Oslos, ledje Fovsen-ákšunisttat heŋgon iežaset plákáhtaid Opera seinniide.
Ieža čohkkájedje dulljjiid alde láhttis. Juste nu go OED feaskáriin čohkkájedje moadde vahkku dás ovdal.
«Mii leat dáppe danne go dál lea 523 beaivvi dan rájes go alimusriekti celkkii ahte bieggaturbiinnat Fovsenis leat lobiheamit.»
Miellačájeheaddjit sihke lávlo, juige ja čurvo ČSV.
«Baajh vaeride årrodh! La fjella leve!»
Miellačájeheddjiin ledje jorggu gávttit badjelis.
ISÁK bovdii lávdái máŋga guosseártista. Okta dain lei Emil Kárlsen.
Oallugiin ledje čáhcon čalmmit go konsearta nogai.
Sámediggeráđi mielláhttu Maja Kristina Jåma salastii doalai Elle Rávnná Näkkäläjärvi guhká ja čavgat.