Bártnážin juo gávnnai dorvvu luođis
Eadni lávii bidjat luohtekaseahta johtui go lei čirrolas.
Beaivválaččat su gohčodit Mathisin, muhto artistan son lea Máhtte Eira.
Beaivvi ovdal konseartta lei NRK šiehtadan Máhtiin deaivvadit hárjehallanbáikkis.
Son lei aitto ollen siiddas.
«Huh, dál šadde hui ollu diŋggat oktanaga. »
Muhto bággu lea hárjehallat musihkkáriiguin ovdal konseartta.
Lihkus lea Máhtte dakkár gii ii jierásnuva nu jođánit, muitala su eadni Berit Marie Eira.
«Son lea maid erenoamáš čigŋái.»
Mánnoviissaid ovdal konseartta álggii juo eadni duddjot bárdnásis.
Ovdal konseartta lei Máhtes ođđa gákti, vuoddagat ja diehpit.
Manne don leat nu juoigalas?
– Eadni lea juoigalas. Oappát maid leat luohteberošteaddjit, čilgesta Máhtte.
Danne lea várra luohti nu lunddolaš sutnje.
«Go lávejin su bidjat nohkkat de dihten goas lea ribahan nahkáriid. Lei dalle go ii šat gullon luohti.»
Son juoiggadii dassážii go ribahii nahkáriid, muittaša eadni.
Moadde diimmu ovdal konseartta lei Máhtes juoga muitalit eadnái.
«In leat muitalan dutnje ahte beaivvi ovdal go áddjá buohccái de bohte munnje imašlaš sánit go ledjen siiddas.»
«In ipmirdan dain maidege dalle. Muhto go don muitalit nuppe beaivvi ahte áddjá lei šaddan buohccivissui, de ipmirdin ahte sánit ledje dajahusat.»
- Su luohtái. Danne áiggun odne juoigat ádjá, muitalii Máhtte.
Son jaskkodii ja gáibi doarggistišgođii.
«Dajahus muitala ahte galgá mannat bures ádjáin.»
Diibmu maniha jođánit. Fáhkka lea konsearta nohkan.
Geahččit spežžot gieđaid, njurgot ja sihtet su juoigat eambbo.
Inga Karen Anna Logje Gaup lei erenoamáš duhtavaš konsearttain.
«Mathis lea nu čeahppi! Ii juoigat leat álki. »
– Ja son lea maid nu čeahppi bidjat dajahusaid, rámpui son nuorra juoigi.
Lei kulturstudio Davvi Division, mii lágidii Máhte konseartta. Doppe sus lei diibmá maid konsearta.
Musihkkabuvttadeaddji guovttos Anthoni Hætta ja Inger Johanne Oskal leigga hui duhtavaččat.
«Mii háliideimmet joatkit Máhtiin ovttasbargat danne go son lea nu bures ovdánan. »
«Son ánssášii beassat čuojahit eanet gehččiide.»