I ein ny artikkel skildrar forskarar korleis ein kan teste ut innsprøyting av sjøsaltpartiklar i skyer, ein metode som kan komme til nytte for å kjøle ned jorda og såleis dempe global oppvarming.
Metoden går under namnet «marine cloud brightening», og går ut på å auke skyenes refleksjon av solstråling ved innsprøyting av sjøsaltpartiklar (sjå faktaboks).
Til saman er 25 forskarar med på den vitskaplege artikkelen som er publisert i Philosophical Transactions of the Royal Society A.
– Dette er ein idé for ei kjapp løysing på eit problem som vi eigentleg burde løyse ved å leggje om til ein økonomi basert på låge karbonutslepp. Men dette har vist seg å vere ein langsam prosess. Eg synest vi bør kjenne til moglegheitene vi har dersom det skulle bli behov for det, seier ein av artikkelforfattarane, atmosfærefysikar Rob Wood, i ei pressemelding frå University of Washington.
- Les også:
Kan bli aktuelt 50–100 år fram i tid
– Per i dag er ikkje denne metoden aktuell, men forskarar tenker at dette kan bli aktuelt 50–100 år fram i tid dersom global oppvarming kjem ut av kontroll, fortel professor i meteorologi Jon Egill Kristjansson ved Universitetet i Oslo til NRK.no.
Han fortel at det som driv stadig fleire forskarar til å studere såkalla geoengineering, metodar for å manipulere klimaet for å dempe global oppvarming, er at ein ser at utsleppa av karbondioksid ikkje ser ut til å stabilisere seg.
– Interessa for geoengineering er ikkje drive fram av halvsprø ingeniørar, men av seriøse og jordnære forskarar som er bekymra for utviklinga, fortel Kristjansson som sjølv er involvert i to EU-støtta forskingsprosjekt innanfor geoingineering.
Det ser ut som flystriper på himmelen, men dette er eit satellittbilete som viser striper danna av skip på Stillehavet.
Foto: NASAUbemanna skip
I artikkelen føreslår forskarane å nytte ubemanna satellittstyrte Flettner-rotorskip som går på vindkraft til å sprøyte sjøsaltpartiklar inn i skyene.
Forskarane ser for seg å sende ut 5 til 10 skip over eit havstrekke på 100 kilometer. Skyene som vil bli danna i dette eksperimentet vil vere store nok til at forskarane kan studere evna deira til å reflektere lys frå satellittar.
Rob Wood og kollegaene hans er tydelege på at eit slikt eksperiment vil vere uvanleg for klimaforskarar som vanlegvis observerer atmosfæren, og ikkje sjølv prøver å endre den.
– Vi argumenterer for at dette er eit nyttig forsøk å gjere, seier Wood.
Wood håpar på at større interesse for metoden i forskarmiljøa kan sikre finansiering for å utføre eksperiment med nedkjølande kunstige skyer.
– Kan få endringar i monsunsirkulasjonar
Kristjansson seier det enno er for tidleg å svare på om «marine cloud brightening»verkeleg kan dempe global oppvarming når det enno ikkje er gjort eksperiment med metoden.
– Men ein del berekningar tyder på at svaret er ja, seier professoren.
Det er også usikkert kva for bieffektar marine cloud brightening vil ha, men Kristjansson seier det er nærliggjande å tru at ein kan få endringar i nedbørsmønster.
– Dei eigna skyene finst ikkje alle stader, så når vi går inn og gjer endringar nokre stader kan vi få ein ubalanse og endringar i til dømes monsunsirkulasjonar, fortel Kristjansson.
