Det amerikanske prosjektet Antweb har som mål å fotografere alle verdas artar av maur, og er no på verdsturné i maurfotografering, skriv BBC Nature.
Forskarane nyttar ein teknikk som for første gong gjer det mogleg å fotografere mikroskopiske anatomiske detaljar ved maurane.
Målet er å lage ein nettbasert katalog som vil utgjere eit unikt verkty for forskarar som studerer desse insekta.
- Les også:
- Les også:
Meir detaljar enn i mikroskop
Fotografiteknikken brukt av forskarane gjer det mogleg å ta dusinvis av forstørra bilete som alle er på ulike fokusplan. Slik oppnår dei skarpe bilete der heile mauren er i fokus, noko som ikkje er mogleg i eit vanleg mikroskop.
– Du kan zoome inn og sjå detaljar som tynne hårstrå og auga. Og alt dette er ikkje i fokus i eit mikroskop, forklarar Brian Fisher ved California Academy of Sciences som leiar Antweb-prosjektet.
– Dette er faktisk første gong eg som forskar kan sjå denne mauren i 3D. Dette er svært nyttig for forskarar, seier Fisher.
Mauren Dorylus sjoestedti frå Nigeria.
Foto: AntwebSkal fotografere 10.000 i året
Til no har forskarane avbileta 8300 maurartar av totalt 30.000 kjende artar verda over.
– Vårt mål er å fotografere 10.000 maur i året, seier Brian Fisher.
Inga lita oppgåve, når forskarane må avbilete dronning, soldatar, arbeidarar og dei ulike kjønna for kvar art.
For å nå målet vil Antweb besøke musea som har dei mest komplette maursamlingane, og første stopp på turneen er ved Natural History Museum (NHM) i London der teamet held seg no.
– Dette museet er ein av dei beste samlingane av maur i verda, ifølgje Fisher. Museet har over 6000 artar av maur som er tredd på nål og tatt vare på i utstillingsmontrar i museets lagerrom.
Vil bli tilgjengeleg for alle
Sjølv om databasen i hovudsak er tiltenkt forskarar, håpar Antweb-teamet at også publikum vil ta i bruk maurkatalogen.
Alle med internettilgang og ei interesse for småkryp kunne nytte katalogen til å få ei innsikt i naturens miniatyrverd.
– Mange veit ikkje om dei utrulege skapningane som lever i bakgården deira, seier Brian Fisher.
Sjå fleire biletgalleri frå Vitskap og teknologi:
