Gekkoar er små øgler som lever i varme klima, og dei har ei evne som vi menneske misunner dei:
– Dei har ei heilt fantastisk evne til å gå oppover ei kvar mogleg overflate, til og med opp-ned, fortel professor i fysikk, Pawel Sikorski ved NTNU til NRK.no.
Nettopp denne evna har ei gruppe amerikanske forskarar ved Stanford University hatt lyst til å overføre til menneske. Derfor har dei utvikla eit syntetisk materiale som hermar etter mønsteret på gekkoens hand- og fot-flater.
I ein ny studie viser dei at ein mann på 70 kilo klarar å klatre oppover ei glatt glasflate med hjelp av handflateplater laga i dette materialet. Dette skriv BBC.
– Gekkoens mekanisme er optimalisert gjennom tusenvis av år. Å kunne kopiere naturen og lage noko som er like bra som det naturen klarar er sjølvsagt ei utfordring for forskarar, forklarer Pawel Sikorski, som sjølv ser til naturen for å hente idear til nye materiale.
- Les også:
Post-it-lapp
Andre forskarar har også herma etter gekkoen tidlegare. Men utfordringa for forskarane har vore å kunne skalere dette opp utan at gekko-effekten forsvinn. Det meiner gruppa frå Stanford å ha fått til betre no.
Sikorski samanliknar gekkoens klisterfot med ein post-it-lapp. Dersom du limer ein post-it-lapp til eit underlag og forsøker å dra den nedover underlaget, er det vanskeleg.
Drar du den derimot av i den andre retninga, er det mykje lettare. På liknande måte kan gekkoen velje å sitte «klistra» til underlaget når det passar han, men sleppe taket når han vil flytte foten.
«Klisteret» er i denne samanhengen svake krefter, såkalla van-der-waals-krefter, som verker mellom molekyla i gekko-foten og underlaget.
- Les også:
Utfordringa har vore å klare å skalere opp slike små post-it-lappar til eit større areal utan å miste tiltrekkingskraft på underlaget, fortel Sikorski.
Det Stanford-forskarane har gjort kan samanliknast med å lime saman eit 20-tals post-it-lappar på ein spesiell måte, slik at dei kunne bere ei større vekt.
- Les også:
– Stor nytteverdi
– Slike gekko-liknande materiale vil kunne ha stor nytteverdi, trur Sikorski. Ein kunne til dømes tenke seg vindaugsvaskarar som kan klatre rett oppover glasflata.
– Men dette er ganske tidleg enno, og det er ei lang veg fram til vi kan bruke dette til noko praktisk.