Bussen i biletet over kom frå Svelgen med 21 passasjerar, men måtte snu og køyre heim att. Svært mange pendlarar som skulle til eller frå Florø på jobb eller skule kom heller aldri fram i dag.
Eit steinsprang som gjekk tysdag kveld stengjer nemleg riksveg 5 ved Leversundet mellom Grov og Sundefjellstunnelen. Det er ikkje omkøyringsmoglegheiter for folk som skal mellom Florø og Førde, eller Florø og Svelgen. Folk som skal mellom Førde og Svelgen er ikkje råka av stenginga.
Vegen kan tidlegast opna mellom klokka 15 og 16. Ein geolog undersøkte området onsdag morgon og skal i føremiddag gjere ei ny vurdering av staden, etter at han såg ei steinblokk. Frykta er at det skal gå fleire ras.
- LES OGSÅ: Ras stengjer Riksveg 5
- LES OGSÅ: I krise kjem gode gjerningar fram
Førebur båtar no
LANGE KØAR: På eit tidspunkt var køane svært lange, men no er det stort sett vogntog og lastebilar att. Mange personbilar har snudd og køyrt heim.
Foto: Vidar Gudvangen / NRKMykje varer og svært mange arbeidarar pendlar kvar dag mellom Florø og Førde. Dei kjem no ikkje fram, då det ikkje finst omkøyring.
Vegvesenet har varsla fylkeskommunen om situasjonen, og det vert no vurdert å setje inn båt for pendlarar som ikkje kjem seg mellom Florø og Førde eller Florø og Svelgen.
– Vi har blitt bedne om å førebu båttransport dersom det skulle verte langvarig stenging. Vi må vente på beskjed frå Statens vegvesen om og eventuelt kva tid det skal setjast inn båt, seier Ole Hæreid i samferdsleavdelinga i fylkeskommunen.
Han veit ikkje om det ein eller fleire båtar, eller kor store båtar som skal setjast inn.
Store mengder post kjem førebels ikkje fram
MÅ VENTE: Mange varer og personar kjem ikkje mellom Florø og Førde eller Florø og Svelgen.
Foto: Vidar Gudvangen / NRKTerje Gabrielsen, distribusjonssjef i posten i Florø, seier dei no berre må vente.
– Vi har sopass store mengder post, at vi kan ikkje gjere det på noko anna måte enn å vente. Vi sit her og ventar, og håpar at vegen opnar klokka 12.
– Dersom det vert lenger enn 12, vurderer de då å setje inn båtskyss eller andre metodar for å få posten fram?
– Ikkje i første omgang. Dette er store mengder, ein trailer med pakkar og brev. Slik det ser ut no må vi berre vente til han opnar.
– Kva betyr det for utkøyring av post til vanlege kundar i Florø?
– Dersom vegen opnar klokka 12, satsar vi på å få ut brev og avviser først. Får vi posten hit rundt 12.30 eller 13.00, får vi ut ein del i dag. Vi går her heile styrken og ventar. Vi er klare.