Det er NRK si nye musikkrealitysatsing «The Hit», det er tale om. I haust kan det norske folk sjå Jan Tore Befring og Håvard Erle konkurrere om interessa til langt meir meritterte artistar – og å nå heilt til topps som dei neste låtskrivarstjernene.
- LES OGSÅ: Desse artistane skal kjempe i «The Hit»
Bidraget til duoen var opphavleg skriven for Førde/Jølster-bandet Drusar, og heiter «Damer og solnedgangar». Låten vart sendt inn for moroskuld.
– Det er jo litt stas og eigentleg ganske stort når det er ein stjerneprodusent som Steve Lillywhite som har plukka ut låtane. Det viser jo at ein ikkje er heilt på jordet med låtskrivinga, seier Befring.
På skjermen 17. oktober
Lillywhite er ikkje kven som helst, og har jobba med stjerner som U2, Rolling Stones, The Killers og Peter Gabriel. I alt konkurrerte 3.162 låtskrivarar om å komme igjennom nålauget. Blant dei 42 som klarte det, var altså Befring og Erle.
Programmet startar 5. september, og 17. oktober dukkar sunnfjordingane opp på TV-skjermen. Då i konkurranse med fem andre låtskrivarar.
Mot slutten av kvart program er det publikum og TV-sjåarane som avgjer kva låt som går til finalen 24. oktober.
(Artikkelen held fram under biletet)
Blant dei 14 artistane som i tur og orden skal plukke seg ut to songar, er veletablerte artistar som Maira Haukaas Mittet, DDE, Trine Rein, Alexander Rybak, Vidar Busk og Jørn Hoel.
– Dette er noko eg verkeleg brenn for: Å finne talent og ein melodi og gjere noko eige med det. Det er det beste eg veit, og det er veldig kult å få dele min kunnskap med folket, seier Rybak.
– TV er kleine greier
Befring og Erle har allereie spelt «Damer og solnedgangar» for dei to artistane som kan velje låten. Korleis det gjekk, står att å sjå.
(Artikkelen held fram under videoen)
– Settingen er spesiell, og det er litt spesielt å sitje i eit lite rom med ein kjent norsk artist heilt i ansiktet. Spelinga og det gjekk greitt. Det verste var TV-kamera. TV er noko kleine greier, humrar Befring.
– Fekk de noko signal frå artistane?
– Eine kom jo inn att og høyrde heile låten. Det er jo eitt bra teikn.
– Starta med eit riff
Låten såg dagens lys for vel eitt år sidan og er blitt spelt i konsertsamanheng.
– Det starta med riffet til Håvard. Det trigga både ideen til tekst og melodi, fortel Befring, som i tillegg er å finne i banda Aventyr og Spitfire.
- LES OGSÅ:
Tekstmessig er «Damer og solnedgangar» basert på eigne erfaringar under eit vorspiel i baksetet på veg til fest i yngre dagar.
– Det hadde ikkje freista å vore med på The Voice eller Idol?
– Dei andre konsepta er karaokekonkurransar. Det er uinteressant når du driver med sjølvlaga musikk.
– Det ironiske er at, skulle låten gå til topps, så har vi klart å lage ein skikkeleg hit som vi ikkje kan gje ut sjølve. Det ville i så fall blitt ein coverlåt.
– Men det er vel ein tanke de kan leve med?
– Ja, det er det. Hadde vi ikkje sendt den inn, så hadde nok dei 700 som har trykt liker på Facebook som hadde fått høyrt den. Det blir fleire som får høyre den, og det er rettferdig mot låten sjølv.