Tidlegare denne veka presenterte analyseselskapet Nivi ei undersøking som foreslår å kutte 26 kommunar til seks.
No luftar Hilmar Høl ideen om å slå saman Årdal, Lærdal, og Aurland til ein stor kommune.
– Eg hadde ønska at vi kunne diskutere dette som ein moglegheit. Det er såpass spennande, seier han.
Lærdal har i dag omlag 2200 innbyggjarar, Årdal i underkant av 5500 og Aurland har 1700.
- LES OGSÅ:
Trur på Indre Sogn Herad
Etter debatten om kommunesammenslåing denne veka, meiner Hilmar Høl at ein må sjå på moglegheita for å slå saman Årdal, Lærdal og Aurland til det han vil kalle storkommunen Indre Sogn Herad. Han trur ein større kommune vil gi eit betre tilbod for innbyggarane.
Han understrekar likevel at dette berre er hans eiga meining, men at det likevel bør diskuterast.
– Eg er ikkje imot samanslåing om det kan gi betre teneste til innbyggjarane.
- LES OGSÅ:
Ser ikkje poenget
Ordførar Noralv Distad i Aurland meiner kommunane har eit godt samarbeid frå før. Han ser ikkje poenget med å slå saman kommunane og meiner Aurland har eit godt nok tilbod til innbyggarane slik det er i dag.
– Det er ikkje aktuelt no å gå inn i ein diskusjon om kommunesamanslåing. Vi har eit solid grunnlag for å halde fram som eigen kommune og løyser oppgåvene for innbyggjarane på beste vis.
Vil klare seg sjølv
Jan Geir Solheim som er ordførar i Lærdal, meiner små kommunar er og gode og at dei fint kan klare seg sjølv.
– Eg meiner at dei kommunane vi snakkar om, har økonomi og struktur slik at vi klarar oss godt aleine.
Likevel trur Hilmar Høl at ein storkommune som Indre Sogn Herrad kan gi større vekst i regionen.
– Ein kommune med 9500 innbyggjarar har eit større vekstgrunnlag enn at ein kjempar kvar for seg, seier han.