Vil la andre styre Lutelandet

Fylkesleiar Arve Mjømen meiner det er tid for at fylkeskommunen og dei fire eigarkommunane sel seg ut av selskapet. I staden vil han at profesjonelle forretningsfolk skal ta over.

– Næringslivet er kjappare i vendinga og snuinga enn det offentlege, og det gjer at dei på eit augneblinks varsel kan ta tak i ting og få det til, seier Mjømen til NRK.no.

Til hinder eller gagn?

Tida for fylkeskommunal fødselshjelp til Lutelandet Utvikling må vera over, meiner leiaren i Sogn og Fjordane Høgre.

Selskapet har dei siste åtte åra prøvd å byggje opp industri på Lutelandet i Fjaler. Mjømen meiner dei konkrete resultata er få. Ei forklaring på det er det offentlege eigarskapet, meiner han.

– Eg trur kanskje det kan vere grunn til å stille spørsmål om det offentlege har vore meir til hinder enn gagn når det gjeld eit effektivt køyr på dette, seier Høgre-leiaren.

• LES OGSÅ: Får byggje vindmøller på Lutelandet
• LES OGSÅ: Fryktar miljøkatastrofe på Lutelandet

– Typisk Høgre

Men den tankegangen er ikkje Arve Helle samd i. Han er ordførar i Fjaler og nestleiar i styret for Lutelandet Utvikling.

– For meg står fram dette som tom retorikk og litt typisk Høgre, seier han til NRK.no.

Fylkeskommunen eig i dag 48 prosent i selskapet og er saman med vertskommunen hovudaksjonær. I tillegg sit Hyllestad, Solund og Askvoll kommunar kvar sine små aksjepostar.

I juni i fjor sa Frp-leiar i Sogn og Fjordane Frank Willy Djuvik at han var skuffa over kva som til då hadde skjedd på Lutelandet. Etter seks år og 100 millionar kroner var det nesten ikkje skapt faste arbeidsplassar.

• LES OGSÅ: Har investert 100 millionar - men arbeidsplassane har ingen sett
• LES OGSÅ: Lutelandet langt etter planen

– Feil tidspunkt å selje seg ut

Sidan 2005 har fylkeskommunen åleine sprøyta inn om lag fire millionar kroner i drift og aksjar. Dei handfaste resultata er ein kai, eit stort planert industriområde og ein vindkraftkonsesjon.

Dessutan arbeider eit privat selskap, Lutelandet Offshore, med å skape arbeidsplassar innan riving og vedlikehald av oljeplattformer.

– Å seie at det ikkje har skjedd så mykje, det synst eg er totalt bomskot. Men det er klart at vi er avhengige av å kome vidare.

– Men å selje sjølve området og gje eigedomsretten frå seg, det må eg seie at eg på dette tidspunktet ikkje kan skjønne at er rett timing, seier styrenestleiaren.

• LES OGSÅ: Lutelandet Offshore i gang neste år
• LES OGSÅ: 100 arbeidsplassar til Lutelandet

– For tidleg

Jenny Følling som er gruppeleiar for Sogn og Fjordane Senterparti meiner det er for tidleg av Sogn og Fjordane fylkeskommune å selje seg ut av Lutelandet utvikling.

– Næringslivet er det som er best i stand til å drive næringslivet, så på eit tidspunkt er det rett. Men eg trur ikkje vi er kome dit enno, seier ho til NRK.no.

– Kva må til for at ein skal kome dit?

– Ein må faktisk prøve å få i stand nokre aktivitetar. Ein har fått ein konsesjon på vindparken, ein må få på plass noko infrastruktur som linjer og andre ting som eg trur er viktige. Og ein bør gjerne ha nokre avtalar om at nokon kjem i gong med aktivitet og brukar kai og dei andre tinga som er etablert der ute, seier Følling.