Regjeringa arbeider no med å plassere raudgrøne politikarar i dei forskjellige ministerstolane.
Fryktar svakare minister
Regiondirektør i NHO i Sogn og Fjordane, Karin Helen Halle fryktar at Navarsete bytter departement.
- Vi er redd det kan bli ein svakare samferdsleminister, forklarar Halle.
Internt i regjeringa jobbar dei på spreng med å få kabalen med statsrådar til å gå opp.
Mest spenning er det kanskje knytt til om partileiarane i SV og Senterpartiet skal halde fram som finansminister og samferdsleminister.
NHO vil behalde Navarsete
Halle og NHO håpar Navarsete held fram.
- Ho har vore veldig tydeleg, og jobba hardt for å få auka løyvingar til samferdsel. Veldig mykje gjenstår å sjå, men det er veldig spennande for oss å sjå om ho forset, eller kven vi får i staden, seier Halle.
- Navarsete vil uansett ha ei sentral rolle
Truleg vil ikkje det vere klart før i neste veke.
Fylkesleiar Knut M. Olsen i Sogn og Fjordane Senterparti er glad for tilliten til partileiaren, men seier det er uvisst kor tid kabalen går opp.
- Det vil eg ikkje spekulere i. Det viktigaste no er at regjeringa set saman det beste landet for å styre landet. Navarsete vil uansett ha ein sentral plass i den kabalen, seier Olsen.
- Bør ha kjennskap til utfordringane
Og Halle har ønskjelista klar, om ikkje Navarsete forset.
- NHO håpar det er ein frå distrikta som kjenner utfordringane bedriftene her har med å få varer ut i marknaden. Som kjenner vegstandarden som er langt frå akseptabel.
- Eg håpar det er nokon som vert lytta til og får gjennom vedtak, avsluttar Halle.
Liv Signe Navarsete vil ikkje kommentere saka.