– Eg sat i stolen, so det gjekk bra med meg, men dei som stod var jo reine bowlingpinnane, seier Vidar Brekke frå Vik i Sogn.
I dag krasja ei ferje i New York inn i kaien midt i rushtida – med sogningen om bord!
- LES OGSÅ:
Han kom frå ulukka i god behald – endå ein gong.
For i 2001 drakk han kaffi i World Trade Center like før det første flyet styrta inn i den første skyskraparen, i 2011 fylte orkanen Irene opp heile kjellaren hans i New Jersey med vatn – og no sat han på ferja som brasa inn i kaien i New York.
– Eg forlét World Trade Center fem minutt før flyet krasja, og det var mykje styr med tornadoane dei siste åra, seier han.
- LES OGSÅ:
Han sat om lag midt på båten i andre etasje då ulukka skjedde.
– Det er omtrent den same type båt som går på Sognefjorden, kanskje litt større. Me visste ikkje kva som skjedde, me krasja jo rett inn i kaien i full fart, ferja bremsa ikkje ned ein gong.
Etter han kom seg i land, var det vidare i ein hektisk arbeidsdag i IT-bransjen i verdsmetropolen.
- LES OGSÅ:
To personar skal vera kritisk skadd etter ulukka, ifølgje politiet.
Fleire av dei skadde passasjerane oppheldt seg på dekk og venta på å gå i land då ferja kolliderte rundt klokka 09 onsdag, lokal tid.
– Har prøvd å få han til å flytta heim
Heime i Vik opplevde familien at sonen endå ein gong var farleg nærme ei ulukke.
– Han var heldig denne gongen også, seier mor hans, Gerd Marie Brekke.
– Det hadde vore ein frykteleg smell, so han var veldig heldig som slapp frå det utan ei skramme, seier ho.
– Du vil ikkje at han skal flytta heim no då?
– Eg har lagt inn mange førespurnader om det, men eg har ikkje klart å lokka han heim endå, seier ho.