Vestlandsopprør mot stamveg-utsetjing

– Ei utsetjing vil vera særs uheldig, seier fylkesordførar Jenny Følling i Sogn og Fjordane.

– Statsråden har vore klar på at avgjerda skulle koma, så ei utsetjing vil vera ei heilomvending, seier Anved Johan Tveit, styreleiar i interesseselskapet Hardangerviddatunnelene.

Følling og Tveit kjempar for kvar sin stamvegtrasé mellom Aust- og Vestlandet, men begge er samde om éin ting: Avgjerda om den nordlege hovudvegen mellom Aust- og Vestlandet – riksveg 52 over Hemsedalsfjellet eller riksveg 7 over Hardangervidda – må ikkje utsetjast.

Men det kan samferdsleminister Ketil Solvik-Olsen (Frp) koma til å gjera. På direkte spørsmål frå NRK vil ikkje statsråden avkrefta at ei utsetjing kan bli utfallet.

Rapport: Utset traséval

– Denne saka er nok greidd ut. Statens vegvesen har greidd ut spørsmålet to gonger og kome til den same konklusjonen: Hemsedalsfjellet må veljast som nordleg aust-vest-stamvegtrasé, seier Følling.

I tillegg til dei to omfattande utgreiingane frå Statens vegvesen, kom i førre veke også ein kvalitetssikringsrapport som Regjeringa har bestilt. Også den rapporten vrakar Hardangervidda og tilrår Hemsedalsfjellet som ny aust-vest-stamveg.

Men rapporten konkluderer òg at Regjeringa fyrst bør greia ut den såkalla Hordalandsdiagonalen, ein ny vegarm frå Bergen som koplar seg på E134 over Haukeli. Ein slik ny utgreiingsrunde vil i så fall bety at sjølve stamvegavgjerda er i det blå. Og det ønskjer heller ikkje Hordalandsdiagonal-forkjemparane:

– Det er blitt brukt så mykje ressursar, og ein har hatt så mange utgreiingsrundar, at politikarane må no seia: Slik blir det, seier Arnfinn Førsund, dagleg leiar i interesseselskapet Hordalandsdiagonalen.

Stortinget ber om avgjerd

Heller ikkje Høgre og Framstegspartiet på Stortinget vil ha ei utsetjing. Det stadfesta transportpolitisk talsperson Åse Michalsen i Frp og Nikolai Astrup (H), leiar i Transport- og kommunikasjonskomiteen, i førre veke.

Ketil Solvik-Olsen vil ikkje bli intervjua i NRK, men skriv dette i ein e-post: «Beslutning om trasevalg vil bli tatt senere og fremlagt i Nasjonal transportplan (NTP).»

Samferdsleministeren legg fram sitt forslag til NTP i løpet av våren. Stortinget vedtek transportplanen i juni.

Skulle avgjerda til Solvik-Olsen vera å utsetja heile trasevalet, er ikkje det i så fall den fyrste gongen: 18. desember 2015 bestemte statsråden at E134 over Haukeli skal vera den sørlege aust-vest-stamvegen, men den nordlege hovudvegen greidde han ikkje å avgjerda den gongen.

• Les meir om utsetjinga her: – Me greier ikkje setje to strekar under svaret

– Statsråden har eit godt nok beslutningsgrunnlag til å gjera ei avgjerd, og eg forventar at sentrale politikarar står opp og tek avgjerda etter den tidsplanen dei har snakka om, seier ordførar i Sogndal, Jarle Aarvoll, nestleiar i interesseselskapet for Hemsedalsfjellet.