Eigentleg skulle 121 cruiseskip ha segla inn mellom fjella i Hardangerfjorden og enda opp i Eidfjord.
I staden kom det berre eitt, og det kom allereie i februar.
På turistkontoret rett ved cruisekaia i bygda heng kalenderen for 2020. Det er tydeleg merka av når skipa skulle ha kome inn dei siste mila av fjorden.
– Det byrja 24. februar. Det anløpet fekk me jo. Men det vart med det, seier Marit Stadheim i Destinasjon Eidfjord.
Sist veke skulle det siste cruiseskipet lagt til kai i Eidfjord. Før sommaren var oppfordringa klar til norske turistar. Nordmenn kunne redde reiselivet om dei la ferien innanlands i år.
Nordmenn redda deler av sesongen
I Eidfjord har dei først og fremst merka godt at utanlandske turistar har uteblitt. I fjor selde dei billettar og aktivitetar for 6,7 millionar kroner.
I år selde dei for 101 000 kroner, ifylgje Stadheim.
– Ein kan tenkja seg korleis det har gått, seier ho.
Dei norske turistane redda delar av sesongen. Sommarmånadane var veldig bra, også for bedriftene i Eidfjord. Men innanlandsturistane forsvann fort.
Oppfordringa til nordmenn om å feriera i Noreg har fungert delvis.
– Det var roleg i september. I oktober vart det heilt stopp, seier Stadheim.
Har tapt 8 millionar
– Det har gått mykje i jakker og klede i år. Troll, nøkkelringar, magnetar og slike småting har det gått mindre av, seier Victoria Czajor ved Norsk natursenter i Eidfjord.
Ho tel over kor mange varer dei har att i suvenirbutikken etter årets turistsesong. Det vart ikkje den rekordsesongen Norsk natursenter hadde trudd det kom til å bli.
– Det vart heilt motsett, konstaterer ho.
Det gjekk likevel betre enn frykta då koronapandemien sette inn for fullt tidleg i vår. Saknet etter dei internasjonale turistane har likevel vore stort.
Norsk natursenter reknar nemleg med at dei har tapt 8 millionar kroner i år.
Mista ni av ti togreisande
Også reiselivsnæringa langs Sognefjorden, nokre mil nord, har merka at cruiseturistane har uteblitt i år. I Flåm pleier 95 prosent av dei besøkande å vera utanlandske turistar.
Det var planlagd at 158 skip skulle segla heilt inn til Flåm inst i Aurlandsfjorden. Også her kom det berre eitt.
– Det har vore krevjande. I år har me hatt 15-20 prosent av det salet me hadde i fjor, seier Solrun Hjelleflat i Flåm AS.
Omsetninga deira i år var på 110 millionar kroner. I fjor hadde dei om lag ein milliard i omsetning. På eitt år har Flåmsbana mista ni av ti reisande.
– Det er klart det er krise i reiselivsindustrien, seier ho.
Men heller ikkje neste år kjem til å bli eit vanleg år, trur Hjelleflat.
– Me håpar me får meir utanlandske gjester, iallfall på slutten av året. Alle ivrar etter å koma i gang att, men det usikkert kva form og størrelse me kan koma tilbake, seier Hjelleflat.