Fylkesveg 614 mellom Svelgen og Ålfoten vart stengd etter at eit tre bles over både veg ei kraftlinje i Sørdalen på Ålfotfjellet. Det byrja å brenne på staden, men den er no sløkt.
Alarmsentralen i Florø opplyser at gnistregn frå kraftlinja skal ha sett fyr på terrenget. Mesta er no på plass for å rydde.
– Alt mannskap i Bremanger er ute i Svelgen. Jobben der er å få vekk personar som oppheld seg utandørs, i tillegg sjekkar dei ut nokre gnistar som var meldt om i utkanten av sentrum, seier vaktleiar på Alarmsentralen Frode Eide.
På grunn av tre som datt over kraftlinjene er Myklebust i Ålfoten utan straum, opplyser Eide.
FLEIRE VELTA TRE: Vegen mellom Kjøde og Otnes i Selje kommune er stengt etter at fleire grantre har blåse over vegen.
Foto: NRK.no-tipsarUtan straum er og Isane i Bremanger.
Politiet melder òg at ein leidning blåste ned og sette fyr på terrenget i Vågsvåg. Kort tid etter vart det opplyst at brannen er sløkt.
Per Magne Kjøde var ute og køyrde i Selje då det plutseleg var full stopp.
– Det er digre grantre som har blåse rett over vegen. Dei har rydda vekk nokre av dei og held på med å sage ned fleire. Dei står og vaiar i toppane, fleire meter fram og tilbake, seier han.
Han fortel om svært sterk vind.
– Akkurat no er det heilt forferdeleg. Det er nesten ikkje råd å fote seg. Eg var ute med dei to gutane mine og det var berre å halde dei godt fast, så dei ikkje bles over ende i dei verste kasta, seier han.
Til no har det kome inn meldingar om tre fylkesvegar som har blitt stengt på grunn av tre som har velta. Det gjeld:
- Fylkesveg 614 ved Bortnetunnelen i Bremanger. (Opna att)
- Fylkesveg 620 mellom Kjøde og Sandvik. (Opna att)
- Fylkesveg 618 ved Vederhus i Selje kommune. (Opna att)
Vegvesenet oppmodar folk som ikkje treng å køyre bil om å halde seg heime.
