– Eg såg for meg det verste. Det einaste eg tenkte på var å beskytta Tiril, seier Ingeborg Børve.
Ho og to månadar gamle Tiril køyrde på den rasutsette vegen rv. 13 søndag kveld, frå Lofthus i retning Odda. Bilen deira var nær å bli treft av eit steinsprang i Deildo i Ullensvang.
– Først forstod eg ikkje kva som skjedde, men i sidesynet såg eg steinar som kom nedover. Eg hadde ikkje tid til å gjera noko, men heldigvis stoppa steinane opp rett ved sida av bilen, seier Børve.
No meiner ho Statens vegvesen må gjera meir for å sikra vegen.
Sikra for 430 millionar
Vegen ved Deildo er blitt rassikra. Arbeida har pågått i årevis. Børve trudde at vegen var trygg i uvêret i helga.
– Og så viste det seg at det var her det var farleg, seier Børve oppgitt.
Den viktige pendlarvegen i Hardanger opna i fjor etter rassikringsarbeidet.
Då rassikringsprosjektet tok til i 2016, var planen å bruka 315 millionar kroner. Etter kvart kom det fram at behovet for betong var elleve gongar større enn dei først rekna med.
Sikringa enda med å kosta 430 millionar kroner.
– Ser ikkje bra ut
No vedgår Vegvesenet at det bør gjerast meir i området der raset gjekk.
– Det ser jo ikkje bra ut. Me må få gjort noko, vedgår byggeleiar for rassikringsprosjektet, Terje Nesse.
Han meiner at rassikringsprosjektet i stor grad har vore vellykka, sett vekk ifrå området der Børve kom køyrande.
– Me har ikkje registrert noko nedfall utover det som er her. Det ser ut til å fungera veldig bra på resten av strekninga, seier han.
– Men her skal det jo vera heilt sikra?
– Me får det aldri 100 prosent sikra, men det skal ikkje sjå ut slik som det gjer her.
Han fortel at dei skal få hjelp av geolog til å vurdera fleire rassikringstiltak.
Ingeborg Børve er overraska over at dette kunne skje etter at så mykje pengar blei brukt for å sikra vegen.
– Eg hadde veldig høg puls og var heilt forskrekka etterpå. Det er ein av dei plassane eg sist hadde trudd det ville skje noko, seier ho.