– Det kjennest ikkje rettferdig. Eg har hatt så mange skadar siste åra, seier Julie Tvinde.
Ho måtte pent halde seg på tribunen då lagvenninnene måtte gi tapt for Randaberg i toppkampen i Gaularhallen laurdag. Men det var ikkje planen berre nokre dagar tidlegare.
Torsdag vart 19-åringen hasteinnlagt på sjukehus.
– Eg hadde vore så dårleg og slapp heile veka. Då eg var hos lege tok dei blodprøve. Og då svaret kom fekk eg beskjed om å reise rett på sjukehuset, forklarer volleyballspelaren.
- Les også:
Det byrja å butte - skikkeleg...
Der fekk Tvinde vite at ho hadde akutt nyresvikt. Ho er framleis innlagd, men får lov til å vere ute av sjukehuset i helga – så lenge ho melder seg dagleg for å ta blodprøver.
Difor kunne ho vere med og heie på lagvenninnene. Men dei hadde nok hatt betre bruk for den tidlegare kapteinen ute på bana:
Heimelaget vann begge dei to første setta 25-19 etter stabilt og solid spel. Då var det stor skilnad på laga i favør Førde. Men så spelte Randaberg seg inn att i kampen, og tok dei tre neste setta.
– Dei to første setta var vi i snitt betre enn det vi plar vere. Det vart tungt å halde oppe. Og då byrja det å butte skikkeleg, forklarer Hilde Elvebakk.
- Les også:
Blir betre med folk tilbake etter skade
Elvebakk er denne sesongen tilbake i Førde, der ho er ein av faktorane til at sunnfjordingane er spådd å vere med heilt i toppen av eliteserien. Ho er nøgd med det Førde presterte dei to første setta.
– Det var å godt å kjenne at det fungerte så bra. No må vi jobbe for at dei gode periodane blir lengre, seier ho.
Mot Randaberg var både Julie Tvinde og Martine Viken ute med sjukdom eller skade. Kapteinen meiner Førde vil bli styrke med dei to tilbake.
– Vi har ein brei stall, men Julie og Martine er i førsteseksaren, så vi vil nok bli tryggare med dei to tilbake, seier Elvebakk.
Håpar på cupfinale og medalje i serien
Det skal mykje til å overgå skadehistorikken til Julie Tvinde. Berre 19 år gammal har ho hatt tre prolapsar, jumpers knee og fingeren ute av ledd.
No håpar ho å vere tilbake på bana om ikkje altfor lenge. Der er målet å spele Førde fram til cupfinale og medalje i eliteserien.
- Les også:
– Det har vore ein kjekk sesong til no. Vi hadde jo nesten gløymt korleis det var å vinne kampar, etter den svake sesongen i fjor. Eg trur dette blir bra, seier Tvinde.