Skiskyttaren frå Vik var ikkje med i Pokljuka, og er heller ikkje med på det norske laget som denne veka går verdscuprenna i Kontiolahti.
Men, noko tidleg avslutting på karrieren er det ikkje.
- LES OGSÅ: Jubla for lagveninna si OL-bronse
– Eg har ikkje vore i slag etter OL og kjende meg litt mentalt utlada. Eg tok ei vurdering og bestemte, i samråd med trenarane, meg for å ikkje gå desse to verdscuprenna, seier Ann Kristin Aafedt Flatland.
Avsluttar med NM
OL-bronsen på stafetten i Sotsji var hennar siste internasjonale meisterskapsmedalje. Etter sesongen legg ho opp som skiskyttar på toppnivå.
- LES OGSÅ: Skaut prikkfritt og klatra 15 plassar
Karrieren blir avslutta med NM på Voss. Flatland vedgår at åtte veker på reis sidan 1. januar har teke på.
– Dei siste dagane har eg kjent at det byrjar å fungere att og at eg har fått overskot. Men eg kjenner at eg treng litt meir trening før eg kan kjempe om dei gjævaste plassane att, seier ho.
Går i Kollen
Når verdscupen blir avslutta med tre renn i Holmenkollen neste helg, blir det både hennar neste og siste internasjonale renn.
Helga etter ventar fire løp når Voss arrangerer NM.
– Skal ein gå i verdscupen må ein vere på hogget og «fit for fight». Ein må kjenne at ein har lyst til å gå og kjempe i toppen. No har eg ikkje kjent meg god nok og har mangla energien eg treng for å legge ned både trening og gå renn, seier ho.
Heim for å trene
Sesongens store mål har ho allereie nådd og lagt bak seg. Dei 22. olympiske vinterleikar i Sotsji.
– Då fekk eg ein liten utlading, og eg har ikkje sett meg klar til å gå skirenn. Då var det betre å reise heim for å trene og lade batteria, seier Flatland.
– Korleis ser du føre deg å avslutte karrieren?
– Eg avsluttar forhåpentlegvis med stafett med Hordaland søndagen på Voss. Det blir nok tøft å kjempe om medalje, men eg har lyst å ha ei god oppleving og ha det kjekt.