Uver stengjer fjellovergangar

Både rv. 7 Hardangervidda og fv. 51 Valdresflya er stengde på grunn av sterk vind og snø. Begge stader blir det ny vurdering klokka 10.

– Hardangervidda blei stengd i natt og Valdresflya i dag tidleg på grunn av uver på fjellet, seier trafikkoperatør Kristian Strømmen ved Vegtrafikksentralen vest.

Dei andre fjellovergangane er opna, men det kan vere snø og is i vegen.

– Bilistar må sko seg etter forholda og bruke vinterdekk. Det er meldt snø over 800–1000 meter, seier han.