Ulvemotstandar og oljevenn vert «viseminister» i Klima- og miljødepartementet

Aleksander Øren Heen (Sp) er utnemnd til statssekretær i Klima- og miljødepartementet under Espen Barth Eide (Ap).

I VGs valomat har den nye statssekretæren svart «heilt ueinig» på å la oljefelt ligge for klimaet, samt «heilt einig» i at det har blitt for dyrt å køyre bensin- og dieselbilar.

Han har tidlegare drive naturforvaltning som leiar i rovviltnemnda og vore ivrig på avtrekkaren for ytterlegare lisensfelling av rovdyr.

Nestleiar i MDG, Arild Hermstad, seier til NRK at utnemninga skjerpar motsetningane som allereie var der

– Det blir ikkje betre av dei har valt inn han i dette departementet, seier han, med Øren statssekretæren som adressat.

Erkjenner spenningar

I Hurdalsplattforma stadfestar den nye regjeringa at ei langsiktig forvaltning av biologisk mangfald og sårbare økosystem vil vere deira «grunnprinsipp».

Regjeringa har også plikta seg til å redusere klimautsleppa med 55 prosent innan 2030, samanlikna med utsleppstal frå 1990.

Øren Heen erkjenner at det eksisterer spenningar og usemje i feltet han blir viseminister for, men seier til NRK at han «ser fram til eit godt samarbeid med natur- og miljørørsla».

– Det å halde kløveren grøn og ha ein fornuftig klimapolitikk som er gjennomførbar er viktig for oss, seier han.

Tidlegare i haust var han aktuell som stortingskandidat frå Sogn og Fjordane, men glapp vervet til fordel for Olve Grotle (H).

– Korleis står dine eigne politiske synspunkt i stil med Hurdalsplattforma?

– Det står seg veldig fint. Folk får bedøme oss på kva vi faktisk leverer av politikk.

På kvar si side av gruva

– Heen har plikta seg til ei plattform og eg ventar at han vil leggje seg på ein meir miljøvenleg line enn det han har vist hittil, seier Hermstad.

Dei to er også usamde om det omstridde gruveprosjektet i Vevring, der 140 millionar kubikkmeter med overskotsmasse er planlagd dumpa i Førdefjorden.

Heen har heile tida uttrykka støtte til prosjektet.

– Det er ei avgjort sak kor det er gitt konsesjon og det ligg ikkje noko i plattforma som tilseier at ein skal ta opp igjen den saka, seier Heen.

Gruveprosjektet fekk konsesjon i fjor sommar, men klagesak ligg no hos Klima- og miljødepartementet.

Om senterpartisten sitt innsteg i departementet vil ha noko å seie for klagesakene, står att å sjå, meiner Hermstad.

– Eg håpar ikkje han får det som han vil.

«Dieselpopulisme»

Tidlegare i år uttrykka minister Barth Eide skepsis til Senterpartiet for at dei «nå tar tak i ein del litt populistiske symbolsaker, som skepsisen til at du ikkje skal kunne køyre i Kongens gate i Oslo med diesel-SUV».

Ap-leiar Jonas Gahr Støre tok avstand frå utsegna til Eide på det etterfølgande landsmøtet.

Eide har sjølv varsla til NRK at drivstoffavgiftene på sikt vil aukast, trass for at Hurdalsplattforma uttrykker det motsette.

Statssekretær Heen understrekar at plattforma og statsbudsjett vil både gjelde for han og for overordna Barth Eide og viser til komande endringsproposisjon til statsbudsjettet.

Endringsproposisjon til det gjeldande statsbudsjettet blir lagt fram komande måndag.