– Eg og Haga har følt oss åleine i denne saka om E16 og vossabanen. Difor er er det ekstra gledeleg at vi klarar å endeleg samlas, seier ordførar i Voss kommune, Hans Erik Ringkjøb.
Ringkjøb og ordførar i Vaksdal kommune, Eirik Haga, kunne gleda seg over ein liten siger i går, men er likevel klare på at kampen ikkje er vunnen.
- LES OGSÅ:
Hoppar ikkje fram i prioriteringskøen
Sjølv om ein samla hordalandsbenk vil jobba for at E16 og den nye vossabanen skal realiserast så fort som råd, betyr ikkje det at dei går inn for å prioritera sambanda mellom Arna og Voss før andre prosjekt – som ferjefri E39 og bru over Bjørnafjorden.
– Det er uaktuelt. Det har ikkje vore ein diskusjon og dei fleste vil meina at det er heilt uaktuelt, seier Øyvind Halleraker frå Høgre som leiar hordalandsbenken på Stortinget.
– Må tenka på meir enn eit prosjekt
Han seier det er uaktuelt for hordalandspolitikarane å utsetja ferjefri E39 for å få i gang bygginga av E16.
– Vi har tidlegare i Hordaland blitt møtt med spørsmål frå sentrale styresmakter om å prioritera mellom store prosjekt, men det har vi aldri gjort og det har gått bra, seier Halleraker.
– Vi fekk beskjed om at Nordhordlandsbrua og Askøybrua ikkje kunne byggast samtidig, og vi fekk beskjed om å prioritera mellom Hardangerbrua eller trekantsambandet, men vi er eit stort fylke som må tenka på fleire enn eit prosjekt om gongen, legg han til.
– Problem med å bli einige
Eirik Haga og Hans Erik Ringkjøb meiner manglande kultur for å villa prioritera – kan verta ei utfordring i kampen for ny veg og ny jernbane.
– Det har vel vore problemet til hordalandspolitikarane at vi har vore veldig ambisiøse i regionen og har hatt problem med å bli einige, seier Haga.
– Det er heilt opplagt at vi kan koma opp i vanskelege prioriteringsdebattar, men vi meiner at Noreg ikkje har råd til å la vera, legg Ringkjøp til.