Briksdalsbreen krympar - men turistane sviktar ikkje

Klimaendringar og ein stadig mindre bre, gjorde at mange var svært spente føre årets turistsesong i Briksdalen. Men spådommane om turistsvikt er gjort til skamme.

Takka vere ein svært god cruisesesong i Olden og naturhungrige turistar, er besøkstala gode ved breen lengst inn i Oldedalen.

– Vi har dei siste par åra vore spente på korleis utviklinga ville bli. Men i sommar har vi hatt mange turistar. Så når vi ser tilbake på sesongen, er vi veldig nøgde, seier styreleiar i Oldedalen skysslag, Jon Olav Kvamme.

• LES OGSÅ: Sjå, no er breen delt i to!
• LES OGSÅ: Breane smeltar framleis

Har eit godt rykte

I sommar brotna breen i to og snøsmeltinga har ført til at breen krympar. Kvamme er samd i at dette er eit paradoks at turistane framleis kjem. Han trur breen held stand fordi den har eit godt rykte.

– Briksdalsbreen er veldig godt kjend, både nasjonalt og internasjonalt. Den har eit godt rykte både blant buss- og cruiseturistar frå mange stader rundt om i verda, så det er nok det som er forklaringa.

Stor naturoppleving

Sjølv om turistane ikkje kjem like nær breen som før, meiner Kvamme det likevel er ei stor oppleving å trass alt vere så nær. Og den våte sommaren har ført til at naturen i Oldedalen har blitt endå meir spektakulær.

– Opplevinga med å ta turen oppover dalen er stor, med mellom anna fosselandskapet. Det har også vore stor snøsmelting, slik at elva har blitt veldig store. Dette er ei flott oppleving for mange.

• LES OGSÅ: Briksdalsbreen fram 8 meter
• LES OGSÅ: Breen er snart historie

Spente føre neste sesong

Men Kvamme vedgår at cruisekaia i Olden har blitt svært viktig for dei.

– Vi har gjort oss meir avhengige av dei enn tidlegare. Når den andre marknaden har gått litt ned, er cruiseturistane viktige for oss.

– Er du spent føre neste sesong?

– Vi i denne næringa er alltid spente, for det kan vere ting ut i verda som påverkar og vi veit lite om framtida. Men vi har gode tal og bestillingar for neste år, seier han.