Trur død person har lege i telt i over eit år – har funne pass og matvarer

Sundag var Turid Mjåtveit ute og leita etter ein sakna dachshund i et område på Sandsli saman med hunden sin Ask og ei venninne.

Hunden hennar har i eitt år trena for å bli redningshund.

– Me delte oss ved bybanestoppet. Eg gjekk innover i skogen og hunden min markerte på eit telt.

Mjåtveit fortel at glidelåsen til teltet var vanskeleg å få opp, og at ho derfor trudde teltet hadde vore igjen lenge.

Før eg opna teltet tenkte eg på at det kunne vera ein person der inne, og at vedkommande kunne vera død.

– Då eg opna teltet og så inn såg eg ein død person, og ein del bøker.

Ho forklarer at teltet berre var rundt 40–50 meter frå bybanestoppet.

– Det eg sit igjen med no er at det er veldig trist. Eg tenkjer mest på kor kaldt samfunnet er.

Veit ikkje om det er mann eller kvinne

Mjåtveit ringde politiet då ho gjorde funnet.

Liket var i svært dårleg forfatning, og politiet veit enno ikkje kven som er funne. Dei kan heller ikkje seia sikkert om det er ei mann eller ei kvinne dei har funne.

– Kvifor er identifiseringsarbeidet så vanskeleg?

– Det er grunna tilstanden på liket. Den tyder på at det har lege der i over eit år, seier politiadvokat Eli Andrea Skaar i Vest politidistrikt.

Har funne pass og matvarer

I teltet har det mellom anna blitt funne matvarer og eit pass.

– Det er funne matvarer med dato. Det hjelper til med å seia noko om kor lenge liket har lege der, seier Skaar.

Passet som vart funne i teltet er eit norsk pass, opplyser politiadvokaten. Personen som eig eller har eigd passet har ikkje vore meldt sakna, seier ho.

– Det er truleg personen på passet som er funne, men det er ikkje sikkert, seier Skaar.

Politiet har forsøkt å koma i kontakt med passet sin eigar.

– Har det skjedd noko kriminelt?

– Det er ikkje noko som tydar på det, seier Skaar.

Liket skal obduserast, men politiadvokaten seier ho ikkje har fått vita akkurat når det blir.

– Det plar å bli gjort i løpet av eit par dagar, seier ho.