Treng minst 250 nye ingeniørar

Det er i første rekke kommunane som vil mangle denne kompetansen, viser tal som KS har samla inn.

KS-leiar i fylket, Jenny Følling, seier løysinga må vere at staten opprettar fleire studieplassar ved Høgskulen i Sogn og Fjordane.

Treng meir pengar

Høgskulen har alt starta opp med ingeniørstudium i elfag. Denne utdanninga er startfinansiert av bransjen sjølv, og det er behov for statlege midlar for å vidareføre den, seier Følling.

– Vi treng 20 nye studieplassar på elkraft for å vidareføre den klassen som er starta opp, og potensialet for å vidareføre det.

– Vi treng også tilsvarande når vi skal starte opp byggstudium, seier Følling.

• LES OGSÅ: Fleire er utan jobb i fylket
• LES OGSÅ: Florø får ingeniørstudie

Opne for nye studium

Innspelet frå KS er nytt for Høgskulen. Rektor Åse Løkeland seier førsteprioritet er å få fullfinansiert el-ingeniørstudiet som allereie er starta opp. Ho er samtidig klar på at dei er opne for nye studium.

– Viss vi får finansiering på studieplassar så vil vi vidareføre elkraftstudiet, det vil vere mi tilråding.

– Behovet som er meldt for byggingeniørar er ein kraftig impuls for oss om å setje oss i gang, føresetnaden er at vi får studieplassfinansiering, seier Løkeland.

Veit ikkje om det blir fleire plassar

Tor Bremer frå Ap sit i Utdanningskomiteen på Stortinget. Han seier regjeringa vil auke talet på studieplassar for ingeniør på landsplan. Kor vidt det kjem fleire studieplassar til heimfylket veit han ikkje.

– Det kjem heilt sikker på nasjonalt nivå, og eg trur også det kjem til Vestlandet.

– Så får vi tru at det er argumentert godt for at det kjem til Sogn og Fjordane også, men det står att å sjå, seier Bremer.