Berre tre parti har liste i alle kommunar

Totalt er det 166 lister ved kommunevala i Sogn og Fjordane til hausten. Det er fire meir enn sist.

• LES OGSÅ: Har 13 lister til fylkestingsvalet

Utbrytar frå Ap, Gunvor Sunde, er initiativtakar og listetopp for eitt av dei nye partia. Samfunnsdemokratane stiller liste til fylkestinget og til kommunevalet i Sunde sin eigen kommune.

• LES OGSÅ: Melder seg ut av AP i protest

Politisk blaff?

NRK sin valkommentator, Knut Henning Grepstad, meiner det er mindre enn det som vart snakak om på førehand.

• LES OGSÅ: Har tru på nytt protestparti

- Det må seiast at det ikkje er kome mykje luft i den ballongen, og det skal veldig god oppslutnad til lista både i Gloppen og fylkestinget til for at dette skal bli noko anna enn eit kort blaff, seier Grepstad.

Stiller i alle kommunar

Ein annan utbrytar frå Arbeidarpartiet, som følgje av sjukehussaka, er Ottar Nygård i Selje. Han toppar Tverrpolitisk liste i sin kommune.

Av dei politiske partia er det berre Ap, Høgre og Senterpartiet som stiller liste i alle kommunar. Venstre manglar i tre kommunar, medan KrF og SV manglar lister i sju kommunar. Frp manglar på si side liste i 11 kommunar.

Puls i Solund

Det er også verd å merke seg at partiet Raudt ikkje stiller liste i to av sine bastionar, Vågsøy og Førde. Partiet sit berre at med liste i Høyanger og Naustdal.

- Det fortel vel at veldig mange av dei tunge aktørane i dette partiet nærmar seg pensjonsalderen, at det ser ut til å vere tydelege problem med nyrekruttering og at dei gamle aktørane byrjar å gå leie, trur Grepstad.

Medan dei aller fleste listene er knytt til parti, har det dukka opp ei ny upolitisk liste, PULS, i Solund.