Tove køyrde sist av ferja. Like etter køyrde ho i eit ras.

– Vi var siste bilen i ferja, og første bilen til raset, så det må ha gått mellom oss og bilen framfor oss, seier Tove Ølnes frå Sogndal.

Ho fortalde om opplevinga først til Sogn Avis.

Ho og tre venninner hadde vore i Årdal, og tok 22.40-ferja frå Fodnes til Mannheller.

Det vart litt avstand til bilen framfor frå ferja. På vegen var det tåke og det er også ein del hjort i området, så venninnegjengen køyrde forsiktig.

Like etter kom eit stort ras.

– Vi måtte bråbremse og måtte rygge tilbake. Vi spurte oss «kjem det meir?». Det var skremmande.

Venninna Lene Dulsvik seier det var små marginar.

– Heile fergekøa hadde passert før oss. Like før raset såg vi også ein møtande bil. Dette skjedde fort. Første tanken vår var: «Herregud, rygg!».

Alle i bilen er godt lokalkjende og seier det sjeldan går større ras på vegstrekninga.

Politiet var på staden litt over kl. 23, der dei observerte steinar «store som bildekk».

Sjølve raset skjedde i Drogi på riksveg 5 mellom Sogndal og Kaupanger. Ei vegstrekning med mykje trafikk, ikkje minst på grunn av ferja like ved.

Fare for fleire skred

Gjennom helga har det blitt sendt ut farevarsel om store mengder nedbør. Også dei neste dagane er det meldt betydelege mengder nedbør på Vestlandet og nordover.

Årsaka til at det kjem ras no er store nedbørsmengder, seier trafikkoperatør Tom Erik Englaugstad hos Vegtrafikksentralen.

– Det kan alltid vere fare for at det kjem ned. Fjellsider og vegstrekningar er sikra så godt det er mogleg, men ein veit aldri. Det kan kome ned steinar.

Sjølve raset i natt omtalar han slik:

– Det var bra størrelse på det. Det sperra godt det eine feltet. Det gjekk ut i det andre feltet også.

Søndag blir det lysregulering forbi rasstaden fordi fjellsida no skal reinskast og sjekkast grunding.