Anne-Grethe stylar dei hottaste kjendisane – no kan nordfjord-jenta bli«Årets hårstylist»

– Det er veldig stas. Eg heldt på å dette av stolen då eg opna e-posten frå frisørforbundet, der eg fekk vite at eg var nominert, seier 32-åringen frå Ytre Røed i Eid.

Starheim har bakgrunn som make-up-artist, og har tidlegare teke to tredjeplassar i make-up-VM. Ho har også prøvd å hevde seg i tevlinga "Årets frisør", men først i år har ho nådd heilt opp.

– Endeleg fekk eg den ettertrakta e-posten som eg har ønskt meg i så mange år. Eg er kjempeglad! Eg har drive både med hår og sminke, men det er sminka som har fått mest merksemd. Så det er kjekt å få meir akting som frisør, seier Starheim.

• LES OGSÅ: Tok tredjeplass i VM i Tyskland
• LES OGSÅ: – Hår er ikke bare hår

Til dagleg arbeider Starheim på salongen "Gevir" på Grünerløkka i Oslo. Mange av kundane er kjendisar, og på Instagram-kontoen sin har Starheim lagt ut mange bilete av kjende fjes som ho har styla. Likevel hevdar ho at det er like kjekt å jobbe med "vanlege folk".

– Det er det som gjer jobben min interessant, å ha litt av alt. Eg set like stor pris på Magda på 83 som på Tone Damli.

Fire nominerte

Det er eit smalt nålauge ein må gjennom for å verte nominert til årets hårstylist. Kandidatane som ønskjer å vere med i kampen, må sende inn alt arbeidet dei har gjort siste året som har vore på trykk, til dømes i blad, på cd-cover eller i reklamekampanjar. Av dei innsende bidraga vel juryen så ut kven som er nominerte.

– Me er fire nominerte frå heile Noreg, og to av oss kjem faktisk frå min salong. Dei to andre kjem frå ein annan stor salong i Oslo. Så no gler alle her på salongen seg til det me kallar Amandaprisen for frisørar, "Årets frisør 2014" i februar.

• LES OGSÅ: Nesten ingen vil bli frisør
• LES OGSÅ: Har ikke vasket håret på 25 år

Men Starheim synest det er lenge å vente til februar med å få vite kven som sigrar.

– Eg skulle gjerne ha visst det i morgon, smiler Starheim, som ikkje har store pengepremiar i vente dersom ho skulle gå sigrande ut av tevlinga.

– Nei, eg blir nok ikkje millionær. Her handlar det om «ære og berømmelse», smiler Starheim.