Færre store byggjeoppdrag - mot tøffare tider for byggjebransjen

Dagleg leiar Finn Ove Øen i Åsen og Øvrelid AS i Førde seier denne marknaden i fylket er i ferd med å tørke ut.

– Vi ser ein helt klar nedgang, spesielt hos fylkeskommunen som har vore ein av våre største kundar i ei årrekkje. Vi har inntrykk av at det generelt er færre store jobbar å rekne når det gjeld det offentlege, seier han.

Åsen og Øvrelid med sine rundt 100 tilsette har dei siste åra hatt ei rekkje store offentlege byggjeoppdrag. Firmaet er i ferd med å ferdigstille rådhuset i Førde, dei bygde politihuset i Florø i tillegg til fleire fylkeskommunale bygningar.

No er det få slike oppdrag i vente, og i det heile mindre å by på.

– Det er også ei utflating på bustader i den private marknaden. Det er tøffare tider enn det har vore i det siste.

• LES OGSÅ: Slik vert det nye rådhuset - neste veke flyttar ordføraren inn
• LES OGSÅ: Har jobbar, men manglar faglærde

Oppdrag med kortare horisont

Tøffare tider bur også Kleiven Sogn AS med base på Årdalstangen seg på. Firmaet som har 33 tilsette bygde mellom anna for Høgskulen i Sogndal, og reiser no Coop-bygget i Øvre Årdal. Dagleg leiar Rolf Ole Kleiven stadfestar inntrykket av at det er mindre å hente av oppdrag for det offentlege.

– Det er mindre å rekne på spesielt når det gjeld større offentlege bygningar. Når det gjeld mindre oppdrag, er det ein viss tilkomst. Vi har ein del å gjere, men det er meir på kortare horisont.

Nyanserer biletet

Allbygg Florø AS med vel 40 tilsette, har ein del oppdrag for det offentlege, det meste for Statnett. Det meste av aktiviteten er i Møre og Romsdal.

– Her i Sogn og Fjordane har ikkje selskapet hatt store offentlege oppdrag på ei stund, seier dagleg leiar Ludvik Solvang.

Men dagleg leiar Knut Løvdal Stauri i HS-Bygg i Stryn nyanserer biletet litt. Hans firma byggjer no helse- og omsorgssenter i Vanylven og Hornindal helsehus, dei byr på eit tilsvarande senter i Svelgen og ventar på Stryn omsorgssenter. Han meiner det er på den private marknaden det er størst nedgang i aktiviteten.

• LES OGSÅ: Stor lærlingmangel i byggbransjen

Tek ikkje sorger på førehand

Men ingen av dei vi har snakka med tek sutene på førehand, Rolf Ole Kleiven i Kleiven Sogn meiner det er bra med mindre oppdrag og ikkje grunn til uro. Finn Ove Øen i Åsen og Øvrelid seier dei reknar med å ha arbeid til alle sine 100 tilsette.

– Vi har greitt med arbeid framover mot neste sommar og så får vi fylle på deretter, seier Øen.